ދުނިޔޭގަ މިހާރު ހިނގަމުންދާ ނުރައްކާތެރި ކޮވިޑް ބަލިމަޑުކަން އިތުރު ތިން އަހަރު ނުވަތަ 2024 ވަނަ އަހަރާއި ހަމައަށް ދެމިގެން ދާނެކަމަށް ފައިޒަރ ކުންފުނިން ލަފާކޮށްފިއެވެ.

ވެކްސިން އުފެއްދުމުގައި މަޝްހޫރު ފައިޒަރ ކުންފުނިން މިގޮތަށް ލަފާކޮށްފައިވަނީ އެކުންފުނިން ކޮވިޑުން ރައްކާތެރިވުމަށް އުފައްދާފައިވާ ވެކްސިނުގެ ފަސް އަހަރުން ދަށުގެ ކުޑަކުދިންނަށް ހާއްސަ ކުރެވިފައިވާ ވެކްސިނުގެ ދިރާސާ ތަހުލީލުތަކުން އުއްމީދީ ނަތީޖާއެއް ނުފެނުމުންނެވެ. ފައިޒަރ ކުންފުނިން ހާމަކޮށްފައިވާގޮތުގައި މިހާތަނަށް އެކުންފުނިން ތައްޔާރުކޮށްފައިވާ ކޮވިޑް ވެކްސިނުން އުމުރުން 2 އަހަރާއި 4 އަހަރާއި ދެމެދުގެ ކުޑަކުދިންނަށް ހާއްސަކޮށްފައިވާ ކޮވިޑް ވެކްސިނުގެ ތަހުލީލު ނަތީޖާއިން، އެއުމުރުފުރާގެ ކުދިންގެ ދިފާއީ ނިޒާމު ވަރުގަދަކޮށްދޭތަނެއް ނުފެނެއެވެ.

އެގޮތުން ކުޑަކުދިންނަށް ހާއްސަ މިވެކްސިން ބޭނުންކުރުމަށް ހުއްދަ ހޯދުމުގެ ކުރިން އިތުރު ތަހުލީލުތައް ފުރިހަމަ ކުރަން ޖެހޭނެކަމަށް ފައިޒަރ ކުންފުނިން ފާހަގަކޮށްފައިވެއެވެ. އަދި މިވެކްސިނުގެ އިތުރު ތަހުލީލުތައް ނިންމައި ނަތީޖާ އާންމުކޮށް މިވެކްސިން ބޭނުންކުރުމަށް ހުއްދައަށް އެދެވޭނީ 2022 ވަނަ އަހަރުގެ ދެވަނަ ކުއަރޓަރގައި ކަމަށް ފައިޒަރ ކުންފުނިން ލަފާކޮށްފައިވެއެވެ.

ވެކްސިން ބޭނުންކުރުމަށް ހުއްދަ ލިބުމަށްފަހު އެކި ގައުމުތަކަށް ވެކްސިން ފޯރުކޮށްދިނުމުގައިވެސް އިތުރު ވަގުތު ނަގާނެކަމަށް އެކުންފުނިން ފާހަގަކުރިއެވެ.

ކޮވިޑުން ރައްކާތެރިވުމަށް ފައިޒަރ ކުންފުނިން ވެކްސިން ތައްޔާރުކޮށްފައިވަނީ ޖަރުމަނުގެ ބަޔޯންޓެކް ކުންފުންޏާއި ގުޅިގެންނެވެ. މިދެކުންފުނިން މިހާތަނަށް ވަނީ ފަސް އަހަރުން މަތީގެ ހުރިހާ އުމުރުފުރާއެއްގެ ކުދިންނަށް ވެކްސިން ތައްޔާރުކޮށް ތަހުލީލުތައްވެސް ނިންމައި، އެވެކްސިންތައް ބާޒާރަށް ނެރެފައެވެ.