އެމެރިކާގެ ނޯވެވެކްސް ކުންފުނީގެ ކޮވިޑް ވެކްސިން ބޭނުންކުރަން ޑަބްލިއުއެޗްއޯއިން ހުއްދަދީފިއެވެ.

ނުވަޒޮވިޑް ނަމަކަށް ކިޔާ މިވެކްސިނަކީ ކޮރޯނާ ވައިރަހުގައި ހިމެނޭ ޕްރޮޓީން ބޭނުންކޮށްގެން އުފައްދާފައިވާ، މިހާރު ހުއްދަދީފައިވާ ވެކްސިން ތަކާ ތަފާތުކޮށް ތައްޔާރުކޮށްފައިވާ ވެކްސިނެއްކަމަށްވެއެވެ. އަދި މިވެކްސިން ވަނީ ޑަބްލިއުއެޗްއޯގެ އިތުރުން އީޔޫއިން ވެސް ބަލައިގަނެފައެވެ.

ނުވަޒޮވިޑް ވެކްސިނަކީ ދެޑޯޒު ފުރިހަމަ ކުރަން ޖެހޭ ވެކްސިނެކެވެ. މިވެކްސިނުގެ އެންމެ ފަހުގެ ތަހުލީލީ ނަތީޖާއިން ދަައްކާގޮތުގައި ކޮވިޑް ބަލިން ރައްކާތެރިވުމަށް މިވެކްސިނަކީ 90 އިންސައްތަ ރައްކާތެރި ވެކްސިނެކެވެ. 45،000 މީހުންނާއެކު ކުރިއަށްދިޔަ މިވެކްސިނުގެ ކްލިނިކަލް ޓްރަޔަލްސްތައް ކުރިއަށް ގެންގޮސްފައިވަނީ އިނގިރޭސިވިލާތާއި އެމެރިކާގައެވެ.

ޑަބްލިއުއެޗްއޯއިން މިވެކްސިން ބޭނުން ކުރުމަށް ހުއްދަ ދީފައިވަނީ 18 އަހަރުން މަތީގެ މީހުންނަށެވެ. އެގޮތުން ތިން ހަފްތާއާއި ހަތަރު ހަފްތާއާއި ދެމެދު މިވެކްސިނުގެ ދެޑޯޒު ފުރިހަމަ ކުރަން ޖެހޭނެކަމަށް ޑަބްލިއުއެޗްއޯއިން ފާހަގަކޮށްފައިވެއެވެ.