ކޮރޯނާ ވައިރަހުގެ ނުރައްކާތެރި ވޭރިއަންޓެއްކަމަށްވާ އޮމިކްރޯން ފެތުރުން ކޮންޓްރޯލް ކުރަން ތައިލޭންޑުގައި އަނެއްކާވެސް ރައްކާތެރި ކަމުގެ ފިޔަވަޅުތައް ވަރުގަދަކޮށްފިއެވެ.

މިގޮތުން އެޅި ފިޔަވަޅުތަކުގެ ތެރޭގައި އެގައުމަށް ދަތުރުކުރާ ފަތުރުވެރިން ކަރަންޓީނުވުމާ ނުލައި ދަތުރުކުރެވޭ ގޮތަށް ކުރިން ދޫކޮށްފައިވާ ހުއްދަ ބާތިލުކުރުން ވެސް ހިމެނެއެވެ. ތައިލެންޑުގެ "ޓެސްޓް އެންޑް ގޯ" ސްކީމްގެ ދަށުން، ވެކްސިން ފުރިހަމަ ކޮށްފައިވާ ފަރާތްތަކުން އެގައުމަށް އެތެރެވުމަށްފަހު ޕީސީއާރް ޓެސްޓުގެ ނަތީޖާ ނެގަޓިވްވެއްޖެނަމަ ކަރަންޓީނުވުމަކާ ނުލާ ފަތުރުވެރިންނަށް ދަތުރު ކުރުމުގެ ހުއްދަ ދީފައިވަނީ މިދިޔަ ނޮވެމްބަރު މަހުއެވެ.

ނަމަވެސް އެގައުމުން ކޮވިޑުގެ އާވޭރިއަންޓުގެ ގިނަ ކޭސްތަކެއް ފެނުމާއިއެކު ނޮވެމްބަރު މަހު އާންމު ކުރި އާގަވާއިދު މިހާރު ވަނީ ބަދަލުކޮށްފައެވެ. އެގޮތުން މިހާރު އެގައުމަށް އެތެރެވާ ފަރާތްތަކުން 10 ދުވަހަށް ކަރަންޓީނު ވާން ޖެހެއެވެ. އަދި ވެކްސިން ފުރިހަމަކޮށްފައި ނުވާނަމަ 14 ދުވަހަށް ކަރަންޓީނުވާން ޖެހޭނެކަމަށް ތައިލެންޑުގެ ސިއްހީ ވުޒާރާ ތަކުން ހާމަކޮށްފައިވެއެވެ.

ތައިލެންޑުގައި މިހާތަނަށް 2.1 މިލިއަން މީހުންނަށް ކޮވިޑް ޖެހިގެން ރިޕޯޓުކޮށްފައިވާއިރު، މިހަފްތާގެ ތެރޭގައި 63 މީހަކަށް މިބަލީގެ ނުރައްކާތެރި ވޭރިއަންޓް، އޮމިކްރޯން ޖެހިގެން ރިޕޯޓުކޮށްފައިވެއެވެ.