އެމެރިކާގައި ކޮރޯނާ ވައިރަހުގެ ނުރައްކާތެރި ވޭރިއަންޓް، އޮމިކްރޯން ޖެހިގެން މީހަކު މަރުވެއްޖެއެވެ.

މިއީ އޮމިކްރޯން ވޭރިއަންޓުގެ ސަބަބުން އެމެރިކާގައި މަރުވި ފުރަތަމަ މީހާއެވެ. އުމުރުން 50 އަހަރުގެ މިމީހާ އަކީ ކޮވިޑުން ރައްކާތެރިވުމަށް ވެކްސިން ނުޖަހާ މީހެއްކަމަށްވެސް އެމެރިކާގެ ޕަބްލިކް ހެލްތުން ހާމަކޮށްފައިވެއެވެ.

އޮމިކްރޯން ވޭރިއަންޓުވަނީ އެމެރިކާގައި އެންމެ ގަދަޔަށް ފެތުރެމުންދިޔަ ޑެލްޓާ ވޭރިއަންޓު ފަހަތައް ޖައްސާލައި ކޮވިޑް ފެތުރުމުގައި ވަރަށް ބޮޑަށް ކުރި ހޯދާފައެވެ. އެގޮތުން އެމެރިކާގެ ސެންޓަރ ފޯ ޑިޒީޒް ކޮންޓްރޯލް އިން ހާމަކޮށްފައިވާގޮތުގައި މިފަހުގެ ކޮވިޑް ކޭސްތަކުގެ ތެރޭގައި 73 އިންސައްތަ އަކީ އޮމިކްރޯން ވޭރިއަންޓާއި ގުޅުން ހުރި ކޭސްތަކެވެ. މިއީ މިދިޔަ ހަފްތާގެ ތަފާސް ހިސާބާ އަޅާ ބަލާއިރު 70 އިންސައްތަ އިތުރުވުމެކެވެ.

ކޮވިޑް-19ގެ އޮމިކްރޯން ވޭރިއަންޓަކީ ނޮވެމްބަރ 16 ވަނަ ދުވަހު ޑަބްލިޔުއެޗްއޯއިން "ވޭރިއަންޓް އޮފް ކޮންސަރން"ގެ ގޮތުގައި ކަނޑައަޅާފައިވާ ވޭރިއަންޓެކެވެ. މި ވޭރިއަންޓް ފެތުރޭ މިންވަރު ހަލުވިކަމަށް ވެސް ޑަބްލިޔުއެޗްއޯއިން ފާހަގަކޮށްފައިވެއެވެ. 

މީގެއިތުރުން، ދެކުނު އެފްރިކާގެ ނޭޝަނަލް އިންސްޓިޓިއުޓް ފޯ ކޮމިޔުނިކަބަލް ޑިސީސަސް، (އެންއައިސީޑީ) އާއި އެމެރިކާގެ ސެންޓާ ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ) އިން ވަނީ "އޮމިކްރޯން" އަކީ ކޮވިޑްގެ މިހާތަނަށް ނުފެންނަހާ ބާރުގަދަ އަދި އަވަހަށް ފެތުރޭ ވޭރިއަންޓެއްކަމަށް ބުނެފައެވެ.