ފައިޒަރ ކުންފުނިން އުފެއްދި، ކޮވިޑް ބަލީގައި ބޮޑުވަރުވާ މިންވަރު ކުޑަކޮށްދޭ، އަދި ބަލީގެ ފަރުވާއަކަށްވެސް ބޭނުންކުރެވޭ، ބޭސް ބޭނުންކުރާއިރު އެހެން ބޭހުގެ ބާވަތްތަކާއި އެއް ނުކުރުމަށް އިލްތިމާސްކޮށްފިއެވެ.

މިފަދައިން އިލްތިމާސްކޮށްފައިވަނީ ޑޮކްޓަރުންނާއި ފާމަސިސްޓުންގެ ޓީމަކުން ކުރި ދިރާސާއަކުން، ފައިޒާއިން އުފެއްދި ބޭސް އެހެން ބޭހުގެ ބާވަތްތަކާއި އެއް ކުރުމުން އިންސާނާގެ ހަށިގަނޑަށް ލިބޭ ގެއްލުންބޮޑުވާތީވެއެވެ. އެގޮތުން މިބޭސްކާއިރު ހާއްސަގޮތެއްގައި އެހެން ބާރުގަދަ ބޭހުގެ ބާވަތްތަކާއި އެއް ނުކުރުމަށް ޑޮކްޓަރުންނާއި ފާމަސިސްޓުންގެ ޓީމުން ވަނީ އިލްތިމާސްކޮށްފައެވެ.

އެގޮތުން ބާރުގަދަ ބޭސްކާން ޖެހޭ ފަރާތްތައް ކަމަށްވާ، ލިވަރ، އަދި ކިޑްނީ މައްސަލަތަކާއި އެނޫންވެސް އެކި ބޮޑެތި ބަލިތައް ތަހައްމަލު ކުރަމުންދާ ފަރާތްތައް މިބޭސްބޭނުން ނުކުރުމަށް ވަނީ އިލްތިމާސްކޮށްފައެވެ.

ފައިޒަރ ކުންފުނީގެ "ޕެކްސްލޮވިޑް" ބޭހަކީ ކޮވިޑަށް ޕޮޒިޓިވް ވެފައިވާ، ދިފާއީ ނިޒާމުގެ ބާރުދަށް، އަދި ދުވަސްވީ މީހުން ބޭނުން ކުރުމަށް އެންމެ ރަނގަޅު ބޭސްކަމަށް އެކުންފުނިން ބުނެފައިވެއެވެ. އެގޮތުން މި ބޭސް ބޭނުން ކުރުމުން ބަލި ބޮޑުވެގެން ހޮސްޕިޓަލުގައި އެނދުމަތި ކުރަންޖެހޭ މިންވަރު 89 އިންސައްތައަށް ދަށްކޮށްދޭނެ ކަމަށް ވެސް އެ ކުންފުނިން ވަނީ ބުނެފައެވެ. އަދި މިބޭހުން ކޮރޯނާ ވައިރަސް ހަށިގަޑުގެ ތެރޭގައި އިތުރުވުމަށް ބޭނުންވާ އެންޒައިމް ބްލޮކް ކޮށްދޭކަމަށްވެއެވެ.

މިބޭސް ބޭނުން ކުރުމަށް އެމެރިކާއިން މިހާރުވަނީ ހުއްދަދީފައެވެ. އެމެރިކާގެ އެފްޑީއޭއިން މިބޭސް ބޭނުންކުރުމަށް ހުއްދަދީފައިވަނީ އުމުރުން 12 އަހަރުން މަތީގެ ކޮވިޑް ބައްޔަށް ހައިރިސްކު މީހުންނަށެވެ. ދެގުޅަ ބޭހުން ޑޯޒު ހަމަކުރާ މިބޭހުގެ ދެވަނަ ގުޅަ ކާންޖެހެނީ ފުރަތަމަ ބޭސްގުޅަ ކާތާ 5 ދުވަހަށް ފަހުއެވެ.