ފައިޒަރ ކުންފުނިން އުފެއްދި، ކޮވިޑް ބަލީގައި ބޮޑުވަރުވާ މިންވަރު ކުޑަކޮށްދޭ، އަދި ބަލީގެ ފަރުވާއަކަށްވެސް ބޭނުންކުރެވޭ ބޭސް ބޭނުންކުރުމަށް ބަހްރައިނާއި، ދެކުނު ކޮރެއާ އަދި އިނގިރޭސިވިލާތުގެ ސަރުކާރުން ހުއްދަދީފިއެވެ.

ފައިޒަރ ކުންފުނިން ބުނެފައިވާ ގޮތުގައި ކޮވިޑް ބަލީގައި ބޮޑުވަރުވާ މިންވަރު 89 އިންސައްތަ ދަށްކޮށްދޭ "ޕެކްސްލޮވިޑް" ބޭހަކީ އޭގެ ކްލިނިކަލް ޓަރައަލްތަކުން ބޭހުގެ ކާމިޔާބުކަން ޔަގީން ކުރެވިފައިވާ ބޭހެކެވެ.

މިބޭސް ބޭނުން ކުރުމަށް ބަހްރައިނާއި، އިނގިރޭސިވިލާތުން ހުއްދަދީފައިވަނީ އުމުރުން 18 އަހަރުން މަތީގެ ކޮވިޑް ބައްޔަށް ހައިރިސްކު މީހުންނަށެވެ. އަދި ދެކުނު ކޮރެއާއިން ހުއްދަ ދީފައިވަނީ އުމުރުން 12 އަހަރުން މަތީގެ ކޮވިޑް ބައްޔަށް ހައިރިސްކު މީހުންނަށެވެ. އެގޮތުން ދެގުޅަ ބޭހުން ޑޯޒު ހަމަކުރާ މިބޭހުގެ ޑޯޒު ފަސް ދުވަހުގެ މުއްދަތެއްގެ ތެރޭގައި ހަމަކުރުމަށްވެސް މިގައުމުތަކުން އިލްތިމާސްކޮށްފައިވެއެވެ.

ޕެކްސްލޮވިޑަކީ ކޮވިޑަށް ޕޮޒިޓިވް ވެފައިވާ، ދިފާއީ ނިޒާމުގެ ބާރުދަށް، އަދި ދުވަސްވީ މީހުން ބޭނުން ކުރުމަށް އެންމެ ރަނގަޅު ބޭސްކަމަށް ފައިޒަރ ކުންފުނިން ހާމަކޮށްފައިވެއެވެ. އެގޮތުން މި ބޭސް ބޭނުން ކުރުމުން ބަލި ބޮޑުވެގެން ހޮސްޕިޓަލުގައި އެނދުމަތި ކުރަންޖެހޭ މިންވަރު 89 އިންސައްތައަށް ދަށްކޮށްދޭނެ ކަމަށް ވެސް އެ ކުންފުނިން ވަނީ ބުނެފައެވެ. ފައިޒަރއިން ބުނީ މިބޭހުން ކޮރޯނާ ވައިރަސް ހަށިގަޑުގެ ތެރޭގައި އިތުރުވުމަށް ބޭނުންވާ އެންޒައިމް ބްލޮކް ކޮށްދޭކަމަށް ތަހުލީލުތަކުން ދައްކާކަމަށެވެ.

މިބޭސް ބޭނުންކުރުމަށް އެންމެ ފުރަތަމަ ހުއްދަދީފައިވަނީ އެމެރިކާއިންނެވެ.