ކޮވިޑު ކޭސްތަކުގެ އަދަދު މައްޗަށް ދާންފެށުމާއިއެކު ރައްކާތެރިކަމުގެ ފިޔަވަޅުތައް ވަރުގަދަކޮށްފައިވާ ފިލިޕީންސްގައި ކަރަންޓީނުގެ ގަވާއިދުތަކާ ހިލާފުވާ މީހުންނަށް ޖަލު ހުކުމެއް އަތުވެދާނެކަމަށް އެގައުމުގެ ސަރުކާރުގެ އިސްއޮފިޝަލުން ހާމަކޮށްފިއެވެ.

ރައްކާތެރިކަމުގެ ފިޔަވަޅުތަކާއި ހިލާފުވާ މީހުންނަށް މިފަދަ ހަރުކަށި އަދަބެއް ދޭނެކަމުގެ އިންޒާރެއް ދިނީ، އެމެރިކާއިން ފިލިޕީންސަށް ދަތުރުކުރި މީހަކު، އޭނާގެ ކަރަންޓީނުގެ މުއްދަތު ހަމަނުވަނީސް ޕާޓީ ކުރިކަން ފަޅާއެރުމުންނެވެ. އަދި އޭނާ ޕާޓީ ކުރިކަން ފަޅާ އެރިއިރު ކޮވިޑަށް ޕޮޒިޓިވްވެ، ގިނަ އަދަދެއްގެ ބަޔަކު އޭނާ އާއި ޑައިރެކްޓް ކޮންޓެކްޓް ވެފައިވެއެވެ.

މިއާއެކު ގަވާއިދުތަކާއި ހިލާފުވާމީހުންނަށް، 1000 ޑޮލަރުން ނުވަތަ 50،000 ޕިލިޕީންސް ޕޭސޯސް އިން ޖޫރިމާނާ ކުރުން ނުވަތަ ހަމަހުގެ ޖަލު ހުކުމެއް ވަނީ ކަނޑައަޅާފައެވެ.

ޕިލިޕީންސްގައި މިހާރުވެސް ކޮވިޑަށް ޕޮޒިޓިވްވެފައިވާ 21،000 އަށްވުރެއް ގިނަމީހުން، އެކްޓިވް ކޭސްގެ ގޮތުގައި ތިބިކަމަށް ތަފާސް ހިސާބުން ދައްކައެވެ. އަދި ކޮރޯނާ ވައިރަހުގެ ނުރައްކާތެރި ވޭރިއަންޓް ކަމަށްވާ އޮމިކްރޯންގެ 14 ކޭސް ރިޕޯޓުކޮށްފައިވެއެވެ.