ސަރުކާރުން ފަށާފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކް" މަޝްރޫޢުގެ ދަށުން އެންމެ އުތުރުގެ 4 އަތޮޅުގައި ހައިސްޕީޑް ފެރީ ނިޒާމް އަންނަ އޭޕްރީލްމަހުގެ ނިޔަލަށް ފެށޭނެކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

ރައީސް ސާލިހު ނ.އަތޮޅަށް ކުރައްވާ ދަތުރުފުޅުގެ ތެރެއިން މަނަދޫ ރައްޔިތުންނާއި ބައްދަލުކުރެއްވުމަށް މިއަދު ބޭއްވި ބައްދަލުވުމުގައި މިނިސްޓަރ އަސްލަމް ވިދާޅުވީ ހައި ސްޕީޑް ފެރީ ނިޒާމު މަޝްރޫޢުގެ ދަށުން ޒޯން އެކެއް ނުވަތަ ހއ، ހދ އަދި ށ އަތޮޅުގެ ގެ ހުރިހާ ރަށްތަކަށް މިއަހަރުގެ އޭޕްރީލްމަހުގެ ނިޔަލަަށް ފެރީގެ ޚިދުމަތް ފެށުމަށް މަސައްކަތް ކުރަމުންދާ ކަމަށެވެ.

އެގޮތުން އުތުރުގެ ރަށްރަށުގައި ހައި ސްޕީޑް ފެރީގެ ޚިދުމަތް ފެށުމަށް ބޭނުންވާ 17 ފެރީ ބަނުމުގެ މަސައްކަތް ގަލްފް ކްރާފްޓާއި ޙަވާލުކޮށްގެން ކުރިއަށްދާއިރު، އޭގެ ތެރެއިން 4 ފެރީ ބަނދެނިމި، އިންޖީނުވެސް އަޅާ ނިމިފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވި ފެރީ ބަނުމުގެ މަސައްކަތް ނިންމާލުމަށްފަހު ހއ، ހދ އަދި ށ އަތޮޅުގެ ރަށްތަކަށް އޭޕްރީލްމަހުގެ ތެރޭގައި ފެރީގެ ޚިދުމަތް ފެށުމަކީ އަމާޒެއްކަމަށެވެ. އަދި ނ، ރ، ބ އަދި ޅ އަތޮޅަށް ބޭނުންވާ ފެރީތައް ބަނދެ، މިއަހަރު ނިމެންވާއިރަށް އެ މަސައްކަތް ފެށުމަކީވެސް އަމާޒެއްކަމަށް މިނިސްޓަރ ވިދާޅުވިއެވެ.

ސަރުކާރުން ކުރިއަށްގެންދާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކް" މަޝްރޫޢަކީ ރާއްޖޭގެ ދަތުރުފަތުރުގެ ދާއިރާއަށް އިންގިލާބީ ބަދަލެއް ގެނައުމުގެ އަމާޒުގައި ސަރުކާރުން ކުރިއަށްގެންދާ މުހިއްމު މަޝްރޫޢެކެވެ.

އަތޮޅުތަކުގައި ފެރީގެ ނިޒާމު ހަރުދަނާ ކުރުމަށް ސަރުކާރުން ކުރާ މަސައްކަތާއެކު، 2023 ގެ ނިޔަލަށް ހއ އިން ފެށިގެން އައްޑޫ ސިޓީއާއި ހަމައަށް ރަނގަޅު ފެރީ ނިޒާމަކުން ގުޅާލުމަކީ މި ސަރުކާރުގެ އަމާޒެއްކަމަށް މިނިސްޓަރ ވިދާޅުވިއެވެ. އަދި ހަރުދަނާ ދަތުރުފަތުރުގެ ނިޒާމަކުން މުޅި ރާއްޖެ ގުޅާލެވިގެން މެނުވީ ރާއްޖެ ތަރައްޤީއެއް ނުކުރެވޭނެކަމަށްވެސް މިނިސްޓަރ ވިދާޅުވިއެވެ.