ރަޝިޔާއިން އެގައުމުގެ އަވަށްޓެރި ޔޫކްރެއިނަށް ހަމަލާ  ދޭނެކަމުގެ ބިރަށް ޔުކްރައިނުގައި ހުންނަ އެމެރިކާގެ އެމްބަސީ ބަންދުކޮށްފިއެވެ.

މިކަން އިއުލާންކޮށްދެމުން އެމެރިކާގެ ސެކްރެޓަރީ އޮފް ސްޓޭޓް އެންތޮނީ ބްލިންކެން ވިދާޅުވީ ޔުކްރެއިންގެ ވެރިކަން ކުރާ ސިޓީ، ކީވްގައި ގާއިމުކޮށްފައިވާ އެމެރިކާގެ އެމްބަސީ ބަންދުކޮށްފައިވަނީ ވަގުތީގޮތުންކަމަށެވެ. އަދި އެގައުމުގެ އެހެން ސިޓީއަކަށް އެމްބަސީ ބަދަލު ކުރުމަށް މަސައްކަތްކުރަމުންދާ ކަމަށްވެސް ބްލިންކެން ވިދާޅުވިއެވެ.

އެމެރިކާއިން މިފަދަ ފިޔަވަޅެއް އަޅާފައިވަނީ ރަޝިޔާއާއި ޔޫކްރެއިންގެ މަސްރަހު ހޫނުވެ، ޔޫކްރެއިނަށް ހަމަލާދީ، އެ ގައުމު ހިފަން އުޅޭކަމުގެ ބިރަށެވެ. އެގޮތުން ޔޫކްރެއިނާއެކު ހާރިޖީ ގުޅުންތައް ވަރުގަދަކޮށް ހާލަތު ގޯސްވިޔަނުދީ އެހީތެރިވުމަށް އެމެރިކާ އޮތީ ތައްޔާރަށްކަމަށްވެސް ބްލިންކެން ވިދާޅުވިއެވެ.

މީގެއިތުރުން ޔުކްރެއިނުގައި ދިރިއުޅޭ އެމެރިކާގެ ރައްޔިތުން ސްޓޭޓް ޑިޕާޓްމެންޓުގައި ރަޖިސްޓްރީވުމަށާއި ހާލަތު ގޯސްވެދާނެކަމަށް ސަމާލުވެ ރައްކާތެރިވެ ތިބުމަށްވެސް އެމެރިކާ ސަރުކާރުން ވަނީ އިލްތިމާސްކޮށްފައެވެ. އަދި ރަޝިޔާއިން ދީފާނެ ހަމަލާއަކުން ރައްކާތެރިވުމަށް ޔުކްރެއިން ދޫކޮށްދިއުމަށް އެދެވިގެންވާކަމަށްވެސް އެމެރިކާ ސަރުކާރުން ވަނީ އިލްތިމާސްކޮށްފައެވެ.

ރަޝިޔާއާއި ޔޫކްރެއިން ގުޅޭ ބޯޑަރު ކައިރިއަށް ރަޝިޔާގެ އެތައް ސިފައިންނެއް ޖަމާކޮށްފައިވިނަމަވެސް ރަޝިޔާއިން ޔޫކްރެއިނަށް ހަމަލާދީ، އެ ގައުމު ހިފަން އުޅޭކަމަށް ދައްކާ ވާހަކަތައް ރަޝިޔާއިން ވަނީ ދޮގުކޮށްފައެވެ. އަދި ރަޝިޔާގެ ފަރާތުން އަވަށްޓެރި ގައުމުތަކަށް ނުރައްކަލެއް ނެތްކަމަށްވެސް ރަޝިޔާގެ ހާރިޖީ ވަޒީރު ސަރްގެއި ލަވްރޯފް މީގެކުރިން ވަނީ ވިދާޅުވެފައެވެ.