އިންޑިއާގައި ބުރުގާ އެޅުން މަނާ ކުރުމާއެކު ކުރަންފެށި މުޒާހަރާތައް ކޮންޓްރޯލްކުރުމަށް ބަންދު ކުރި ސްކޫލްތައް އަލުން ހުޅުވައިފިއެވެ.

އިންޑިއާގެ ކަރްނަޓަކާ ސްޓޭޓްގައި ކުރަންފެށި މިމުޒާހަރާތަކަކީ މިދިޔަ މަހު އެސްޓޭޓްގެ ސްކޫލްތަކާއި، ކޮލެޖު އަދި ޔުނިވަރސިޓީތަކުގައި ބުރުގާ އެޅުން މަނާކުރުމާއިއެކު ފެށި މުޒާހަރާތަކެކެވެ. މިއާއެކު އެސްޓޭޓްގެ ގިނަ ސްކޫލް އަދި ކޮލެޖްތަކުގެ ކުރިމަތީގައި ދަރިވަރުންނާއި ބެލެނިވެރިންވަނީ މުޒާހަރާކޮށްފައެވެ.

މިކަމާގުޅިގެން ކަރްނަޓަކާ ސްޓޭޓްގެ ކޯޓަކުން ވަނީ ވަގުތީގޮތުން އެއްވެސް ދީނެއް ރަމްޒުކޮށްދޭ ނިޝާނެއް ސްކޫލެއްގެ ތެރޭގައި ބޭނުންކުރުންވެސް މަނާކޮށްފައެވެ. މިއާއެކު ސްކޫލްތައް ދޮށުގައި ކުރަމުންދިޔަ މުޒާހަރާތައް ހޫނުވެ ކަރްނަޓަކާ ސްޓޭޓްގެ ސްކޫލްތައް ވަގުތީގޮތުން ވަނީ ބަންދުކޮށްފައެވެ.

މީގެއިތުރުން އިންޑިއާގެ އެހެން ސްޓޭޓްތަކުގެ ސްކޫލްތަކާއި، ކޮލެޖު އަދި ޔުނިވަރސިޓީތަކުގައި ބުރުގާ އެޅުން މަނާކުރާ ބިލެއް އިންޑިއާގެ ގާނޫނުހަދާ މަޖިލީހަށް ހުށައަޅާ ހިސާބައް ގޮސް، އިންޑިއާގެ އެހެން ސްޓޭޓްތަކާއި ސިޓީތަކުގައިވެސް މިކަމާ ދެކޮޅަށް މުޒާހަރާކޮށްފައިވެއެވެ.

ނަމަވެސް މުޒާހަރާ ކުރުން މަނާކުރާ ގަވާއިދެއް ތަންފީޒުކޮށް، އިންޑިއާގެ ކަރްނަޓަކާ ސްޓޭޓްގެ ސްކޫލްތައް މިހަފްތާގައި ވަނީ ހުޅުވަންފަށާފައެވެ. އަދި ދަރިވަރުންގެ ރައްކާތެރިކަމަށް ފުލުހުން ދަނީ ސްކޫލްތައް ކައިރީ ހަރަކާތްތެރިވަމުންނެވެ.

ސްކޫލްތަކުގައި އަލުން ކިޔަވައިދޭންފަށާފައިވަނީ ބުރުގާ އަޅާ ދަރިވަރުންނަށްވެސް ސްކޫލްތަކަށް ވަދެ، ކިޔެވުމާއި އިމްތިހާނުތަކުގައިވެސް ބައިވެރިވުމުގައި ހުރަހެއްނެތިއެވެ.