އަފްގާނިސްތާނުގެ އަންހެން ކުދިންނަށް މަތީތައުލީމު ހާސިލުކުރަން ފުރުސަތު ނުދިނުމަށް ތާލިބާނުންނަށް ދެއްކެން އޮތް ބަހަނާއެއް ދައްކާނެ ކަމަށް މަލާލާ ޔޫސަފްޒައި ބުނެފިއެވެ.

އަންހެން ކުދިން ތައުލީމު އުނގެނުމުގެ މުހިންމުކަން މުޅިދުނިޔެއަށް އަންގައިދެމުންދާ މާލާލާ މިހެން ބުނެފައިވަނީ އަފްޢާނިސްތާނުގެ އަންހެން ކުދިން ސްކޫލަށް ކިޔަވަން ދިއުން ހުއްދަ ކުރުމަށް ނިންމިތާ 11 ގަޑިއިރުވެސް ނުވަނީސް އެ ނިންމުން ބަދަލުކޮށް، އެކަން މަނާކުރުމުންނެވެ.

މީގެ 7 މަސްދުވަސް ކުރިން އަފްގާނިސްތާނުގެ ވެރިކަމަށް ތާލިބާނުން އެރިފަހުން ގްރޭޑް 6 އިން ފެށިގެން މަތީ ގްރޭޑްތަކުގެ އަންހެން ކުދިން ސްކޫލަށް ދިއުން އޮތީ މަނާކޮށްފައެވެ. ނަމަވެސް އިއްޔެ ވަނީ އަންހެން ކުދިން ކިޔަވަން ދިއުމަށް ހުއްދަ ދީ، ސްކޫލްތައްވެސް ހުޅުވާފައެވެ. އެ ހުއްދަ ދިންތާ 11 ގަޑިއިރުވެސް ނުވަނީސް ތާލިބާނުންގެ ސަރުކާރުން ވަނީ އެ ނިންމުން ބަދަލުކޮށް، ގްރޭޑް 6 އިން ފެށިގެން މަތީ ގްރޭޑްތަކުގެ އަންހެން ކުދިން ސްކޫލަށް ދިއުން މަނާކޮށްފައެވެ.

މިކަމާ ގުޅިގެން ސުލްޙައިގެ އިނާމުވެސް ހާސިލުކޮށްފައިވާ މަލާލާ ބުނީ އަންހެން ކުދިން ޕްރައިމަރީ ސްކޫލަށްވުރެއް މައްޗަށް ކިޔަވާކަށް ތާލިބާނުން ބޭނުން ނުވާނެކަމަށެވެ. އަދި ތާލިބާނުން ބޭނުންވަނީ އަފްގާނިސްތާނަކީ އަންހެން ކުދިންނަށް އެއްވެސް ތަޢުލީމެއް ދޭން ބޭނުންނުވާ ގައުމެއްކަން ދައްކުވައިދޭންކަމަށް މަލާލާ ފާހަގަކުރިއެވެ.

"އަފްގާނިސްތާނުގެ އަންހެން ކުދިން ސްކޫލަށް ކިޔަވަން ދިއުން ހުއްދަ ކުރުމަށް ނިންމި ހިސާބުންވެސް އިނގޭ މީގެކުރިންވެސް ބަހަނާ ދެއްކިގޮތަށް އަންހެން ކުދިންނަށް ތައުލީމު އުނގެނެން ފުރުސަތު ނުލިބޭނެކަން. މިއީ މީގެ ކުރިންވެސް ކަން ހިނގާފައިވާގޮތް. ބަހަނާއެއްގެ ގޮތުގައި ދައްކާނެ ކުދިންގެ ޔުނީފޯމޭ، ކްލާސް ރޫމް ވަކިކުރަން ޖެހެޔޭ، އަންހެން ކުދިންނަށް ކިޔަވައިދޭން ޖެހޭނީ އަންހެން ޓީޗަރުންނޭ. މިއީ އެއްވެސް ވަރަކަށް އާ އުޒުރުތަކެއް ނުން." މަލާލާ ބުންޏެވެ.

ޕާކިސްތާނަށް އުފަން މަލާލާއަކީ ކުޑައިރުއްސުރެން އިންސާނީ ހައްގުތަކަށް ވަކާލާތުކޮށް، އޭރު ޕާކިސްތާނުގެ ބޮޑުބަައެއްގައި ވެރިކަން ކުރަމުންދިޔަ ތާލިބާނުންގެ ސަބަބުން ކުރިމަތިވަމުންދިޔަ ގޮންޖެހުންތައް މުޅި ދުނިޔޭގެ ސަމާލުކަމަށް ގެނައި ކުއްޖެކެވެ. ހާއްސަގޮތެެއްގައި އަންހެން ކުދިން ތައުލީމު އުނގެނުމުގެ ފުރުސަތުތަކުން މަހުރޫމްކުރުމަށް ތާލިބާނުން ކުރަމުން ދިޔަ މަސައްކަތަށް ބައިނަލް އަގުވާމީ އެތައް ޖަމިއްޔާ ޖަމާއަތްތަކެއްގެ ސަމާލުކަންވެސް އޭނާއަށް ލިބިގެންދިޔައެވެ. ނަމަވެސް މަލާލާގެ މިމަސައްކަތުގައި ބޭރުގެ އެތައް މީޑިޔާއަކަށް ދިން އިންޓަރވިއުތަކާއި އޭނާގެ ބްލޮގް ގައި ހާމަކުރަމުންދިޔަ މައުލޫމާތުގެ ސަބަބުން އޭނާވީ ތާލިބާނުންގެ ޝިކާރައަކަށެވެ.

އެގޮތުން 2012 ވަނަ އަހަރު ސްކޫލް އިމްތިހާނެއް ނިންމާފައި ގެއަށް ދަނިކޮށް އޭނާ މަރާލުމަށް ތާލިބާނުން ވަނީ މަލާލާގެ ބޮލަށް ބަޑިޖަހާފައެވެ. އެތައް ދުވަހެއްގެ ސިއްހީ އެހީތެރިކަމާއެކު އޭނާގެ ފުރާނަ ސަލާމަތްވިއިރު މަލާލާ އަށްވަނީ މުޅިދުނިޔޭގެ ސަމާލުކަންލިބިފައެވެ. ދެން އޭނާ މަސައްކަތް ފެށީ ތައުލީމު ހާސިލު ކުރުމުގެ ހައްގުތަކަށް ވަކާލާތު ކުރުމަށެވެ.