ޖަރުމަނާއި ފްރާންސުގައި ތިބި ރަޝިޔާގެ ޑިޕްލޮމެޓުން އެގައުމުތަކުން ބޭރުކުރަން ނިންމައިފިއެވެ.

އެގޮތުން ޖަރުމަނުގެ ސަރުކާރުން އިއްޔެ ވަނީ އެގައުމުގައި ތިބި ރަޝިޔާގެ 40 ޑިޕްލޮމެޓުންނަކީ މިހާރު މުހިންމު ނޫން ބައެއް ކަމުގައި ކަނޑައަޅައި، އެޑިޕްލޮމެޓުން ޖަރުމަނުން ބޭލުމަށް ނިންމާފައިވާކަމަށް ހާމަކޮށްފައެވެ. އަދި ފްރާންސުންވެސް ވަނީ އެގައުމުގައި ރަޝިޔާގެ 35 ޑިޕްލޮމެޓުން އެގައުމުން ބޭރުކުރަން ނިންމާފައިވާކަން ހާމަކޮށްފައެވެ.

ޖަރުމަނާއި ފްރާންސުން މިފަދަ ނިންމުމެއް ނިންމާފައިވަނީ ރަޝިޔާއިން ޔުކްރެއިނަށް ދެމުންދާ ހަމަލާތައް ކުށްވެރިކޮށެވެ. ޖަރުމަނާއި ފްރާންސުގެ އިތުރުން، ޔޫރަޕުގެ އެހެން ގަައުމުތަކުންވެސް ދަނީ ރަޝިޔާއިން ޔުކްރެއިނަށް ދެމުންދާ ހަމަލާތައް ކުށްވެރިކޮށް ރަޝިޔާއާއި ދެކޮޅަށް މިފަދަ ހަރުކަށި ފިޔަވަޅުތައް އަޅަމުންނެވެ.

މިއަހަރުގެ ފެބްރުއަރީ މަހު ޔުކްރެއިނުގެ ބިންތައް އަތުލުމަށް ރަޝިޔާއިން ފެށި އުދުވާނީ ހަމަލާތަކުގައި އެތައް އިމާރާތެއް ބިމާ ހަމަވެ، އެތައް ބަޔަކު އަމިއްލަ ގެދޮރު ދޫކުރަން ޖެހުމުގެ އިތުރުން ގިނަ އަދަދެއްގެ އާންމުން ވަނީ މަރުވެފައެވެ.

މިހަމަލާތަކުގެ ފުރަތަމަ ފޭސް ނިންމި ކަން ހުސްވި މަހު ފަހުކޮޅު ރަޝިޔާއިން އިއުލާން ކުރިނަމަވެސް، ޔުކްރެއިނުގެ ވެރިރަށާއި ކައިރީގައި އޮންނަ ބުޝާ އަވަށުގައި ތިބި އާންމުން އަނިޔާވެރިގޮތަކަށް މަރާލުމުން ރަޝިޔާގެ ސަލާމަތީ ބާރުތަކަށް މުޅި ދުނިޔެއިން ދަނީ ފާޑު ކިޔައި އަނިޔާވެރިކަން ހުއްޓާލުމަށް ގޮވާލަމުންނެވެ.

ރަޝިޔާއިން ޔުކްރެއިނަށް ދެމުންދާ ހަމަލާތަކާއިއެކު، އެހަމަލާތައް ހުއްޓުވުމަށް މަޖުބޫރުކޮށް ދުނިޔޭގެ އެކި ގައުމުތަކުން ދަނީ އެކިކަހަލަ ފިއްތުންތައް ކުރިމަތިކުރުވަމުންނެވެ.