އިގްތިސާދީ ހާލަތު ދައްވެ ހާލުގައި ޖެހިފައިވާ ލަންކާގެ ރައްޔިތުންނަށް އިންޑިއާގެ ހާއްސަ ކްރެޑިޓް އެހީއެއްގެ ދަށުން ހަނޑުލާއި އެހެނިހެން ކާބޯތަކެތި ފޮނުވަން ނިންމައިފިއެވެ.

އެގޮތުން އިންޑިއާއި ލަންކާއަށް ކާބޯތަކެތި ފޮނުވަން ހަމަޖެހިފައިވަނީ ލަންކާއަށް އެހީވުމަށް ދެގައުމުގެ ދެމެދުގައި ސޮއިކޮށްފައިވާ އެއްބިލިއަން ޑޮލަރުގެ ކްރެޑިޓް ސްކީމްގެ ދަށުންނެވެ. ހުސްވި މަހު ސޮއިކޮށްފައިވާ މިސްކީމްގެ ދަށުން ކާބޯތަކެތީގެ އެހީ ވީހާވެސް އަވަހަކަށް ލަންކާއަށް ލިބޭނެކަމަށް ސްރީލަންކާއަށް ކަނޑައަޅާފައި ހުންނަވާ އިންޑިއާގެ ހައިކޮމިޝަނަރ ގޯޕާލް ބަގަލޭ ވަނީ ވިދާޅުވެފައެވެ.

ގޯޕާލް ވިދާޅުވީ ލަންކާއަށް އެހީވުމަށް މިދިޔަ ތިންމަސް ދުވަހު އިންޑިއާއިން މެދުނުކެނޑި މަސައްކަތްކުރަމުން ދާކަމަށާއި، އެގޮތުން ލަންކާއަށް އެހީވުމަށް ދެ ކްރެޑިޓް ސްކީމެއް ހަމަޖެހިފައިވާކަމަށެވެ. މިސްކީމްތަކުގެ ތެރެއިން 500 މިލިއަން ޑޮލަރުގެ އެހީއިން ތެޔޮ ފޯރުކޮށްދެވޭނެކަމަށާއި، އެއް ބިލިއަން ޑޮލަރުގެ އެހީއިން ކާބޯތަކެއްޗާއި ޒަރޫރީ ބޭނުންތަކަށް ބޭނުންވާ ތަކެތި ލިބިގެންދާނެކަމަށެވެ.

މިއީ ސްރީލަންކާގެ ތާރީހުގައި ސަރުކާރުގެ މާލީ ހާލަތު މިހާ ދަށަށް ދިޔަ ފުރަތަމަ ފަހަރެވެ. އެގޮތުން އިގްތިސާދީ ހާލަތު ދައްވެފައިވާ ލަންކާގައި ކާބޯތަކެއްޗާއި ތެލުގެ އަގުމަތިވުމާއިއެކު ލަންކާގެ ގިނަބަޔަކު ހާލުގައި ޖެހެމުންދާ ކަމަށް ލަންކާގެ ކަމާބެހޭ އިދާރާތަކުން ބުނެއެވެ.