ރަޝިޔާއިން ހަމަލާ ދިނުމުގެ ކުރިން ޔުކްރެއިނުގެ އިރުމަތީ ސަރަހައްދުގައި ދިރިއުޅޭ އާންމުން ރައްކާތެރިސަރަހައްދުތަކަށް ދިއުމަށް އެދެފިއެވެ.

ރަޝިޔާއިން ދެމުންދާ ހަމަލާތަކުގެ ފުރަތަމަ ފޭސް ނިންމާލައި ވަގުތީ ގޮތުން ހަމަލާތައް މަޑުޖައްސާލައިފައިވާއިރު ހަމަލާތަކުގެ ދެވަނަ ފޭސް އަމާޒު ކުރާނީ ޔުކްރެއިނުގެ އިރުމަތީ ސަރަހައްދަށްކަމަށް ރަޝިޔާއިން ވަނީ ހާމަކޮށްފައެވެ. އެގޮތުން ހަމަލާތައް އަމާޒުކުރާނީ ޔުކްރެއިނުގެ ދޮންބަސްގެ އިރުމަތީ ސަރަހައްދަށް ކަމަށް ރަޝިޔާއިން  ބުނެއެވެ.

މިއާއެކު ޔުކްރެއިނުގެ ބޮޑުވަޒީރުގެ ނާއިބު ވަނީ ޔުކްރެއިނުގެ އިރުމަތީ ސަރަހައްދުގައި ދިރިއުޅޭ އާންމުން އެސަރަހައްދު ދޫކޮށް ދިއުމަށް އެދިފައެވެ.

ޔުކްރެއިން ސަރުކާރުން ހާމަކޮށްފައިވާގޮތުގައި ފެބްރުއަރީ މަހު ފެށި ހަމަލާތަކުގެ ސަބަބުން ޔުކްރެއިނުގެ ދެކުނުގެ ސަރަހައްދުތަކުގައި ފެނާއި، ކާބޯތަކެއްޗާއި ކަރަންޓު ނެތި އެތައް ހާސްބަޔަކު އަދިވެސް ތާށިވެފައި އެބަތިއްބެވެ. އަދި ތަފާސްހިސާބުތަކުން ބުނާގޮތުން 4.3 މިލިއަނަށްވުރެ ގިނަ މީހުން ވަނީ ހަމަލާތަކުން ސަލާމަތްވުމަށް ޔުކްރެއިން ދޫކޮށް އެހެން ގައުމުތަކަށްވެސް ހިޖުރަކޮށްފައެވެ.

ރަޝިޔާއިން ދެމުންދާ ހަމަލާތަކުގަައި ޔުކްރެއިނުގެ 7000 އަށްވުރެއް ގިނަ ސިފައިންނާ، 1500 އަށްވުރެއް ގިނަ އާންމުން ވަނީ މަރުވެފައެެވެ.