އދ. ގެ އިންސާނީ ހައްގުތަކާބެހޭ ކައުންސިލުން ރަޝިޔާ ސަސްޕެންޑު ކުރަން ވޯޓެއް ނެގުމަށް ނިންމައިފިއެވެ.

އެމެރިކާއިން އިސްނަގައިގެން އދ. ގެ އިންސާނީ ހައްގުތަކާ ބެހޭ ކައުންސިލުން ރަޝިޔާ ސަސްޕެންޑު ކުރަން އެދިފައިވަނީ، ޔުކްރެއިނުގެ ބައެއް އަވަށްތަކުގައި އަނިޔާވެރިގޮތަކަށް ގިނަ އަދަދެއްގެ އާންމުން މަރާލައިފައިވާކަން ހާމަވުމުންނެވެ. މިކަމާގުޅިގެން ހަނގުރާމަކުރުމުގެ ގަވާއިދުތަކާ ރަޝިޔާއިން ހިލާފުވެފައިވާކަމަށްވެސް ތުހުމަތުކޮށްފައިވެއެވެ.

ހަނގުރާމަކުރުމުގެ ގާނޫނާ ގަވާއިދުތަކުގައި ބުނާގޮތުގައި، ގަސްތުގައި އާންމުން މެރުމާއި، ހަނގުރާމައިގައި ހައްޔަރުކުރެވޭ މީހުންނަށް އަނިޔާވެރިވުމާއި، މަގްސަދެއް ނެތް ގޮތުގައި އާންމުންގެ ތަކެއްޗަށް ގެއްލުން ދިނުމާއި، މީހުން ރަހީނުކުރުމަކީ މަނާކަމެކެވެ.

އދގެ އިންސާނީ ހައްގުތަކާ ބެހޭ ކައުންސިލުން ރަޝިޔާ ސަސްޕެންޑު ކުރުމުގެ މައްސަލަ ފެންމަތިވެގެން ދިޔައީ، ރަޝިޔާގެ ހަމަލާތަކުގެ ފުރަތަމަ ފޭސް ނިންމައި ޔުކްރެއިނުގެ ބައެއް އަވަށްތައް ދޫކޮށް ރަޝިޔާގެ ސިފައިން ފޭބިއިރު އަނިޔާވެރިގޮތަކަށް ގިނަ އާންމުން މަރައި އުކާލައިފައި ތިބި މަންޒަރު ސެޓެލައިޓް ފޮޓޯ ތަކުން އާންމު ކުރުމުންނެވެ.

ސެޓެލައިޓް ފޮޓޯއާއި ވީޑިއޯތަކުން ފެންނަ ގޮތުގައި ޔުކްރެއިނުގެ ގިނަ އަދަދެއްގެ އާންމުންގެ އަތްތައް ފަހަތަށް އައްސައި، ބޮލަށް ބަަޑިޖަހައިފައި ހުރިކަން ފާހަގަވެއެވެ.