ވޭތުވެދިޔަ 75 އަހަރު ތެރޭގައި ޕާކިސްތާނުގެ އެއްވެސް ބޮޑުވަޒީރަކު މަގާމުގެ ދައުރު ފުރިހަމަކޮށްފައި ނުވާއިރު، ޕާކިސްތާނުގެ އެންމެ ފަހުގެ ބޮޑުވަޒީރު އިމްރާން ޚާންވެސް މަގާމުން ވަކިކޮށްފައިވަނީ ދައުރު ފުރިހަމަ ނުވަނީހެވެ.

ޕާކިސްތާނުގެ ބޮޑުވަޒީރު އިމްރާން ޚާންގެ މައްޗަށް އިތުބާރު ނެތް ކަމަށް ފާސްކުރީ ގާނޫނު ހަދާ މަޖިލީހުގައި ރޭ ނެގި ވޯޓްގައެެވެ. މިވޯޓުގައި 174 މެމްބަރުން ވަނީ އިމްރާން ޚާންގެ އިތުބާރުނެތްކަމަށް ވޯޓް ދެއްވާފައެެވެ.

މިއާއެކު ޕާކިސްތާނުގައި މިހާތަނަށް 29 ބޮޑުވަޒީރަކު ވެރިކަން ކުރައްވާފައިވެއެވެ. މީގެ ތެރެއިން 18 ބޭފުޅަކު ވަނީ މަގާމުގެ ދައުރު ހަމަނުވަނީސް މަގާމުން ދުރުކޮށްފައެވެ. ބާކީ 11 ބޮޑުވަޒީރުންނަކީ ވަގުތީގޮތުން ނުވަތަ ކުޑަ ދުވަސްކޮޅަކަށް މަގާމާ ހަވާލުވެވަޑައިގެންފައިވާ ބޭފުޅުންނެވެ.

މީގައި އެންމެ ފާހަގަކޮށްލެވެނީ 1993 ވަނަ އަހަރެވެ. އެގޮތުން އެއަހަރު ފަސް ފަހަރަށް ބޮޑުވަޒީރު ބަދަލުވިކަމަށް ރިޕޯޓުތައް ބުނެއެވެ.

ޕާކިސްތާނުގައި އެންމެ ކުރުމުއްދަތަކަށް ބޮޑުވަޒީރުކަންކޮށްފައިވަނީ ދެހަފުތާގެ މުއްދަތަށެވެ. އަދި އެންމެ ދިގުމުއްދަތަކަށް ބޮޑުވަޒީރުކަންކޮށްފައިވަނީ ހަތަރު އަހަރާއި ދެމަސްދުވަހުގެ މުއްދަތަށެވެ.

ޕާކިސްތާނުގެ ބޮޑުވަޒީރު އިމްރާން ޚާން މަގާމުން ދުރުކުރިއިރު، އިމްރާން ޚާން ވަނީ ބޮޑުވަޒީރުގެ މަގާމުގައި ތިން އަހަރާއި ހަތްމަސްދުވަސް ހޭދަކުރައްވާފައެވެ.

މީގެއިތުރުން، ޕާކިސްތާނުގެ ތާރިހުގައި މުހައްމަދު ނަވާޒް ޝަރީފަކީ ތިންފަހަރަށް ބޮޑުވަޒީރުކަމުގެ މަގާމާ ހަވާލުވެވަޑައިގެން ފުރަތަމަ ބޭފުޅާއެވެ.