ޓްވިޓަރ ކުންފުނި ގަތުމަށް މަޝްހޫރު ބިލިއަނަރު އީލަން މަސްކް ހުށައަޅައިފިއެވެ.

ޓެސްލާ ކުންފުނީގެ ވެރިޔާ އީލަން މަސްކަކީ މިހާރުވެސް ޓްވިޓަރ ކުންފުނީގެ 9 އިންސައްތަ ޝެއަރހޯލްޑަރެކެވެ. އަދި ކުންފުނީގެ ޝެއަރގެ ބާކީ 91 އިންސައްތަ ގަތުމަށް 43.4 ބިލިއަން ޑޮލަރު އީލަން ހުށައަޅާފައިވާކަން ފެންމަތިވެގެން ގޮސްފައިވަނީ މިދިޔަ ބުދަދުވަހުއެވެ.

އީލަންގެ ފަރާތުން މިފަދަ ހުށައެޅުމެއް ލިބިފައިވާކަން ޔަގީކޮށްދެމުން އިއްޔެ ޓްވިޓަރ އިން ބުނީ އެކުންފުނީގެ ޝެއަރގެ ބާކީ 91 އިންސައްތަ ގަތުމަށް ހުށައަޅާފައިވަނީ ކޮންމެ ހިއްސާ އަކަށް 54.20 ޑޮލަރުގެރޭޓުން ކަމަށެވެ. އަދި އީލަން ގެ ހުށައެޅުން ރިވިއުކޮށް ކުންފުންޏަށް އެންމެ ފައިދާހުރިގޮތަކަށް ކަންކަން ނިންމާނެކަމަށްވެސް ޓްވިޓަރ ކުންފުނިން ހާމަކޮށްފައިވެއެވެ.

މިމަހު ކުރީކޮޅު ޓްވިޓަރ ކުންފުނީގެ ޝެއަރއިން 9 އިންސައްތަ ގަތުމަށް ފަހު ޓްވިޓަރގެ ބޯޑް އޮފް ޑިރެކްޓަރުންގެ ޓީމާ ގުޅޭނެކަމަށްވެސް އީލަން ބުނެފައިވެއެވެ. ނަމަވެސް ޓްވިޓަރ ކުންފުނި ގަތުމަށް ހުށައަޅާފައިވަނީ ޓްވިޓަރގެ ބޯޑް އޮފް ޑިރެކްޓަރުންގެ ޓީމާ އީލަން މަސްކް ނުގުޅޭނެކަމުގެ ޔަގީންކަން ޓްވިޓަރގެ އިސްވެރިޔާ ޕަރާގް އަގަރްވާލް ދިންފަހުންނެވެ.