މިއަދުގެ ފަތިސް ނަމާދު ވަގުތުގައި ފަލަސްތީނުގެ އަލް އަޤްސާ މިސްކިތައް އިޒްރާއީލުން ހަމަލާ ދީފިއެވެ.

ހާހެއްހާ މީހުން ނަމާދުކުރަނިކޮށް އިޒްރާއީލުގެ ސިފައިން ސްޓަން ގްރެނޭޑް، ކަރުނަ ގޭސް އަދި ބަޑީގެ ބޭނުންކޮށް ދިން މިހަމަލާގައި 150 އަށްވުރެ ގިނަ މީހުންނަށް ވަނީ އަނިޔާވެފައެވެ. މިހަމަލާތަކުގެ ތެރެއިން ފަލަސްތީނުގެ 300 އަށްވުރެ ގިނަ މީހުން ވަނީ އިޒްރާއީލުގެ ބެލުމުގެ ދަށަށް ގެނެސްފައެވެ.

މިހާދިސާ އާއި ގުޅިގެން އިޒްރާއީލުގެ ސިފައިން ބުނީ މިސްކިތު ގޯތި ތެރެއަށްވަނީ ނަމާދުކޮށް ނިމުމަށްފަހު އެސަރަހައްދުގައި އެއްވެ ތިބޭ މީހުން ބޭރުކުރަން ކަމަށެވެ. އަދި ހަމަލާ ދިނީ ނަމާދުން ފައިބައިގެން ދިޔަ މީހުން ގާއުކަން ފެށުމުންކަމަށެވެ.

ނަމަވެސް ދައުރުވަމުންދާ ވީޑިއޯތަކުން ފެންނަ ގޮތުގައި އިޒްރާއީލު ސިފައިން ހަމަލާ ދީފައިވަނީ ފަލަސްތީނުގެ ރައްޔިތުން ސުލްޙަވެރިކަމާއިއެކު އަޅުކަމުގައި ތިއްބައެވެ.

ފަލަސްތީނުގެ ބިންތައް އަތުލުމަށް މަސައްކަތް ކުރަމުންދާ އިޒްރާއީލުން ދެމުންދާ ހަމަލާތައް މިފަހަކުން ހަރުކަށިވެފައިވާއިރު މިދިޔަ ދެދުވަހުގެ ތެރޭގައި އެކަނިވެސް ފަލަސްތީނުގެ 7 މީހަކު ވަނީ އިޒްރާއީލުން މަރާލައިފައެވެ.