ރަޝިޔާއިން ދެމުންދާ ހަމަލާތަކުގައި ޔުކްރެއިނުގެ 3000 ހަކަށް ސިފައިން މަރުވެފައިވާކަމަށް ޔުކްރެއިނުގެ ރައީސް ވޮލޮޑީމީރް ޒެލެންސްކީ ވިދާޅުވެއްޖެއެވެ.

ޒެލެންސްކީ ވިދާޅުވީ މިދިޔަ 7 ހަފުތާގެ ހަމަލާތަކުގައި 2500 އާއި 3000 އާއި ދެމެދުގެ އަދަދަކަށް ޔުކްރެއިނުގެ ސިފައިން މަރުވެފައިވާކަމަށެވެ. އަދި މިހަމަލާތަކުގައި 10،000 ސިފައިންނަށް އެކިވަރުގެ އަނިޔާ ލިބިފައިވާކަމަށް ޒެލެންސްކީ ވިދާޅުވިއެވެ.

މީގެ އިތުރުން، ރަޝިޔާގެ ހަމަލާތަކުން ދިފާއުވުމަށް ޔުކްރެއިނުން ދެމުންދާ ހަމަލާތަކުގައި 20،000 ރަޝިޔާގެ ސިފައިން މަރުވެފައިވާކަމަށްވެސް ޒެލެންސްކީ ވިދާޅުވިއެވެ. ނަމަވެސް ރަޝިޔާއިން ހުސްވި މަހު ހާމަކޮށްފައިވަނީ 1351 ރަޝިޔާގެ ސިފައިން މަރުވެފައިވާކަމަށާއި، 3825 ސިފައިންނަށް އަނިޔާލިބިފައިވާކަމަށެވެ.

ރަޝިޔާގެ ހަމަލާތަކުގެ ފުރަތަމަ ފޭސް ނިންމައި ރަޝިޔާއިން ހިފާފައިވާ ޔުކްރެއިނުގެ ބައެއް ސަރަހައްދުތައް ދޫކޮށް ދިޔަނަމަވެސް، ޔުކްރެއިނުގެ މަރިއޮޕޮލް ސިޓީއަށް ދެމުންދާ ހަމަލާތައް ވަނީ ވަރުގަދަކޮށްފައެވެ. އެގޮތުން މަރިއޮޕޮލް ސިޓީގެ ހާހަކަށްވުރެ ގިނަ އާންމުން ހަމަލާތަކުގައި މަރުވެފައިވާކަމަށާއި، އަދި އެސިޓީއިން އެހެން ރައްކާތެރި ސަރަހައްދުތަކަށް ބަދަލުނުކުރެވި ތާށިވެފައި 10،000 އެއްހާ މީހުން ތިބިކަމަށްވެއެވެ.