އޮމިކްރޯން ސަބްވޭރިއަންޓް އެކްސް.އީ ގެ ސަބަބުން އިންޑިއާއަށް ކޮވިޑް ބަލިމަޑުކަމުގެ އިތުރުރާޅެއް އެރުމުގެ ބިރުބޮޑުކަމަށް ކަމާބެހޭ މާހިރުން ބުނަންފަށައިފިއެވެ.

އިންޑިއާގައި އޮމިކްރޯން ސަބްވޭރިއަންޓް އެކްސް.އީ ވޭރިއަންޓްގެ ކޭސްއެއް ރިޕޯޓުކޮށްފައިވަނީ މިހިނގާ އޭޕްރިލް މަހުގެ 6 ވަނަ ދުވަހުއެވެ. އޮމިކްރޯން ސަބްވޭރިއަންޓް އެކްސް.އީ ވޭރިއަންޓް ފެނުނުތާ ދެހަފްތާއެެއްހާ ދުވަހުގެ ތަފާސް ހިސާބުތަކަށް ބަލާއިރު އިންޑިއާގެ މުމްބާއީ އަދި ދިއްލީފަދަ ބޮޑެތި ސިޓީ ތަކުގެ ކޭސްތައް އިތުރުވަމުންދަނީ މިސަބްވޭރިއަންޓުގެ ސަބަބުންނެވެ.

އޮމިކްރޯން ސަބްވޭރިއަންޓް އެކްސް.އީ އަކީ ކުރިން ފެނިފައިވާ އޮމިކްރޯން ވޭރިއަންޓުގެ ދެ ސަބްވޭރިއަންޓެއްގެ ހައިބްރިޑް ވަރޝަން އެކެވެ. ސަބްވޭރިއަންޓް އެކްސް.އީ ނުރައްކާތެރިވަނީ ކޮރޯނާ ވައިރަހުގެ އެކި ވޭރިއަންޓް ތަކުގެ ޖެނެޓިކްސް މިކްސްއެއް އެކުލެވިގެންވާތީއެވެ. އެގޮތުން މިސަބްވޭރިއަންޓުގެ ސަބަބުން ކޮވިޑް ބަލި ފެތުރުމުގެ 10 އިންސައްތަ އިތުރުވެގެންދާކަމަށް ކަމާބެހޭ މާހިރުން ފާހަގަކުރެއެވެ.

މިސަބްވޭރިއަންޓް ފެނުނު ފަހުން، ދިއްލީއިން ޖީނޯމް ސީކުއެންސް ދެނެގަތުމަށް ނެގި 300 ސާމްޕަލްގެ 52 އިންސައްތައިގެ ސާމްޕަލުން އޮމިކްރޯން ސަބްވޭރިއަންޓް އެކްސް.އީ ފެނިފައިވެއެވެ. މިއާއެކު މިހާރު ދިއްލީގައި ރިޕޯޓު ކުރަމުންދާ ކޮވިޑް ކޭސްތައް އިތުރުވެ، ކޮވިޑް ބަލިމަޑުކަމުގެ އިތުރުރާޅެއް އެރުމުގެ ބިރުބޮޑުކަމަށް ކަމާބެހޭ މާހިރުން ލަފާކުރެއެވެ.

މިދިޔަ ބުރާސްފަތި ދުވަހު އެކަނިވެސް 900 އަށްވުރެ ގިނަ ކޮވިޑް ކޭސް އިންޑިއާގެ ދިއްލީއިން އެކަނިވެސް ރިޕޯޓުކޮށްފައިވެއެވެ. މިއާއެކު ދިއްލީގެ ޕޮޒިޓިވިޓީ ރޭޓުވެސް ވަނީ 4.71 އިންސައްތައަށް މަތިވެފައެވެ.