މާލޭގައި ފުލުހުން ކުރިއަށްގެންދިޔަ ޙާއްސަ އޮޕްރޭޝަނެއްގައި އަތުލައިގަތް 17 ކިލޯގެ މަސްތުވާތަކެތީގެ މައްސަލާގައި ހައްޔަރުކުރި އެންމެން ފުލުހުންގެ ބަންދުން ދޫކޮށްލައިފިއެވެ.

މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން ޑްރަގް އެންފޯސްމަންޓުން ހިންގި މަސްތުވާތަކެތީގެ އޮޕަރޭޝަނެއްގައި ގިނަ އަދަދެއްގެ މަސްތުވާތަކެތި ހޯދައި ހަތަރު މީހަކު ހައްޔަރުކޮށްފައިވަނީ މިދިޔަ މާރޗް މަހުގެ 20 ވަނަ ދުވަހުއެވެ. އެ އޮޕަރޭޝަންގައި ފުލުހުން ވަނީ ޕިކަޕެއް ހުއްޓުވައި މަސްތުވާތަކެތި ފޮރުވާފައިހުރި ގާތްގަނޑަކަށް 15 ކަރުދާސް ފޮށިގަނޑު ފުލުހުންގެ ބެލުމުގެ ދަށަށް ގެންގޮސްފައެވެ.

އެތަކެއްޗަކީ ވައިގެ މަގުން ރާއްޖެއަށް މަސްތުވާތަކެތި އެތެރެކޮށްފައިވާ ކަމަށް މޯލްޑިވްސް ކަސްޓަމްސް ސަރވިސްއިން ދިން މައުލޫމާތަކާ ގުޅިގެން ފުލުހުން ކުރިއަށްގެންދިޔަ އޮޕަރޭޝަނެކެވެ. މިމައްސަލައާ ގުޅިގެން ހައްޔަރުކޮށްފައިވަނީ ދެ ދިވެހިންނާއި ދެ ބިދޭސީންނެވެ.

އެއީ ކ. ހިންމަފުށީ ސީސަންގޭ އަބްދުﷲ އަހްތަރާއި، ގ. ބްރައިޓްސްޓަރ މުހައްމަދު އިމްއާން ޝަމީލާއި ބަންގްލަދޭޝް ދެމީހުންކަމަށްވާ މުހައްމަދު ބުރުހާނުއްދީނާއި، އަބްދުއްރަހުމާނެވެ. އޭގެ ތެރެއިން ދެ ބިދޭސީންގެ ޕާސްޕޯޓް ހިފެހެއްޓުމަށްފަހު ކްރިމިލް ކޯޓުން ވަނީ މިދިޔަ ބުދަ ދުވަހު އެ ދެ މީހުން ވެސް ދޫކޮށްލާފަ އެވެ. އަދި ދެ ދިވެހިންގެ ބަންދުގެ މުއްދަތު ހަމަވުމުން އިތުރަށް ބަންދުގައި ބޭތިއްބުމެއްނެތި އެދެމީހުންވެސް މިހާރުވަނީ ދޫކޮށްލާފައެވެ.

ކަސްޓަމްސް އިން ބުނެފައިވަނީ އެމައްސަލާގައި ހައްޔަރުކުރި މީހުން މަސްތުވާތަކެތި އެތެރެކުރަން އުޅުނީ އިންޑިއާމަގުން ރާއްޖެއައި އެއަރކާގޯ ފާޓިލައިޒާ ޝިޕްމަންޓެއްގައި، އޯގަނިކް ފާޓިލައިޒާގެ ގޮތުގައި ޑިކްލެއާކޮށްގެންކަމަށެވެ. އަދި އެ ތަކެތި ތަހުލީލުކުރުމުން ކެނެބިސްއަށް ޕޮޒިޓިވްވެފައިވާ ކަމަށާއި އޭގެ މަގުމަތީ އަގު 13.6 މިލިއަން ރުފިޔާއަށް އަރާނެ ކަމަށް ކަސްޓަމްސުންވަނީ ބުނެފައެވެ.

ފުލުހުން ބުނީ މި މައްސަލާގައި ތުހުމަތުކުރެވޭ މީހުން ދޫކޮށްލި ނަމަވެސް ޑްރަގް އެންފޯސްމަންޓުން ދަނީ މައްސަލަ ތަހުގީގު ކުރަމުން ކަމަށެވެ.