އެމްޑީޕީން 2018 ވަނަ އަހަރު ރިޔާސީ އިންތިޚާބަށް ނެރުނު މެނިފެސްޓޯގައި ރައްޔިތުންނަށް ވެފައިހުރި ވައުދުތައް ގަރާރެއް ނެރެގެން ފުއްދުމަށް ޕީޕިއެމްގެ ނާއިބް ރައީސް އަހުމަދު ޝިޔާމް ގޮވާލައްވައިފިއެވެ.

ޝިޔާމް މިކަމަށް ގޮވާލެއްވީ ފެނާއި ނަރުދަމާގެ ޤާނޫނަށް އިސްލާހު ގެނައުމަށް ސަރުކާރުން ހުށަހަޅާފައިވާ ބިލާ ގުޅޭ ގޮތުން މިއަދުގެ މަޖިލީހުގައި ބަހުސް މަރުހަލާގައި ވާހަކަ ދައްކަވަމުންނެެވެ.

އިންޑިޔާ އައުޓް ކެމްޕޭން ހުއްޓުވުމަށް ރައީސް ސާލިޙު ނެރުއްވި ގަރާރާއި ބެހޭ ގޮތުން ވާހަކަ ދައްކަވަމުން ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ މި ސަރުކާރަކީ ޤަރާރު ސަރުކާރެއް ކަމަށެވެ. އަދި ރައީސް އިބްރާހިމް މުހައްމަދު ސާލިޙު ގަރާރުތައް ނެރުއްވައިގެން ގާނޫނު ހައްދަވަމުން ގެންދަވާ ކަމަށް ޝިޔާމް ވިދާޅުވިއެވެ.

"ރައްޔިތުންގެ ޙައްޤުތައް ނިގުޅައިގަންނަނީ ރައީސުލްޖުމްހޫރިއްޔާ ޤަރާރު ޤަރާރު ނެރެގެން." ޝިޔާމު ވިދާޅުވިއެވެ.

މީގެ އިތުރުން ޝިޔާމް ވަނީ ރައީސް ސާލިޙުގެ ގަރާރެެއް ނެރުއްވައި އެމްޑީޕީގެ ސަރުކާރުން ރައްޔިތުންނަށް ވީ ވައުދުތަށް ފުއްދުމަށް ސަރުކާރަށް ގޮވާލައްވާފައެވެ. ޝިޔާމް ވިދާޅުވީ އެއީ އިދިކޮޅުގެ އަޑު ކަނޑުވައިލުމަށްވުރެ މާ މުހިއްމު އަދި ބޭނުންތެރި ކަމެއް ކަމަށެވެ.

ޝިޔާމް ވިދާޅުވީ ޚިޔާލު ފާޅުކުރުމާއި އެއްވެއުޅުމުގެ މިނިވަންކަމަކީ އަސާސީ ޙައްޤުތަކެއް ކަމުގައި ބަޔާންކުރީވެސް ޤާނޫނު އަސާސީން ކަމަށެވެ. އަސާސީ ޙައްޤުތައް ޤާނޫނަކުން ހިފެހެއްޓޭ ނަމަ، އަސާސީ ޙައްޤުތައް ކަށަވަރުކޮށްދިނުމަށް މަޖިލީހުން ޤާނޫނު ހެދުމުގެ ބަދަލުގައި ރައީސުލްޖުމްހޫރިއްޔާގެ ޤަރާރަކުން އެކަން ކުރެއްވުން މާ ރަނގަޅުވާނެ ކަމަށްވެސް ޝިޔާމު ވިދާޅުވިއެވެ.