ހަނިމާދޫ އިންޓަނޭޝަނަލް އެއަރޕޯޓު ތަރައްގީ ކުރުމަށް ސަރުކާރުން ކުރަމުން ގެންދާ މަސައްކަތުގެ ތެރެއިން ހުށައަޅާފައިވާ ޓެކްނިކަލް ބިޑްތަކުގެ އިވެލުއޭޝަން މަސައްކަތް ނިންމައި ފައިނޭންޝަލް ބިޑިންގ އަށް ހުޅުވާލައިފިއެވެ.

ހަނިމާދޫ އެއާޕޯޓް ތަރައްގީ ކުރުމަށް ޝައުގުވެރިވާ ފަރާތްތަކަށް ބީލަން ހުށަހަޅަން ހުޅުވާލި ފުރުސަތު 3 މާރޗް 2022 އަށް ހަމަވިއިރު 4 ކުންފުންޏަކުންވަނީ ބީލަން ހުށަހަޅާފައެވެ.

ޓޫރިޒަމް މިނިސްޓްރީގެ ސްޓޭޓް މިނިސްޓަރ އަޙްމަދު އާތިފު މިއަދު ވިދާޅުވީ، ހަނިމާދޫ އެއަރޕޯޓު ތަރައްގީ ކުރުމުގެ މަޝްރޫއުގެ ދަށުން ހުށައަޅާފައިވާ ޓެކްނިކަލް ބިޑު އިވެލުއޭޝަން މިހާރު ނިމިފައިވާ ކަމަށެވެ. އަދި ފައިނޭންޝަލް ބިޑިންގއަށް މިހާރު ހުޅުވާލާފައިވާ ކަމަށް އޭނާ ވިދާޅުވިއެވެ.

Hanimaadhoo International Airport Development Project’s technical bid evaluation completed and opened for financial bidding. The airport will have the capacity to cater to 1.3 million passengers per year & will be a catalyst for economic growth in the North. pic.twitter.com/G2wCTnO5p0

— Ahmed Athif (@Ahmed_Athif) April 28, 2022

އޭނާ އިތުރަށް ވިދާޅުވީ، ހަނިމާދޫ އެއަރޕޯޓު ތަރައްގީކުރަން ރާވާފައިވަނީ އަހަރަކު 1.3 މިލިއަން ފަސިންޖަރުންނަށް ހިދުމަތްދެވޭ ގޮތަށް ކަމަށެވެ.

އިކޮނޮމިކް މިނިސްޓްރީން މީގެ ކުރިން ހާމަކޮށްފައިވާ ގޮތުގައި، ހަނިމާދޫ އެއާޕޯޓް ތަރައްގީ ކުރުމުގެ ޕްރޮޖެކްޓް ކުރިއަށް ގެންދާނީ ދެ ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހި ނިމޭއިރު އެއާބަސް އޭ320 މަރުކާގެ މަތިންދާބޯޓްތަކާއި ބޯއިން 737 މަރުކާގެ މަތިންދާބޯޓުތައް އެ އެއާޕޯޓަށް ޖެއްސޭނެއެވެ.

ދެވަނަ ފިޔަވަހި ނިމޭއިރު، އެއާބަސް އޭ330 މަރުކާގެ މަތިންދާބޯޓުތަކާއި ބޯއިން ބީ777 މަރުކާގެ ބޯޓުތައް ޖެއްސޭ ވަރަށް އެއާޕޯޓް ތަރައްގީކުރާނެއެވެ.

މި މަސައްކަތްތައް ނިމޭއިރު، މެދުއިރުމައްޗާއި، ދެކުނު އޭޝިއާ އާއި ދެކުނު އިރުމަތީ އޭޝިއާ އާއި އިރުމަތީ އެފްރިކާގެ ގައުމުތަކުން ސިދާ ފްލައިޓްތައް ހަނިމާދޫ އަށް އޮޕަރޭޓް ކުރުމުގެ ގާބިލުކަން ލިބޭނެއެވެ.