ފުވައްމުލަކު ސިޓީގައި ޑައިވިނަށް ދިޔަ 2 މީހުންގެ ތެރެއިން އެކަކު ގެއްލި، އަނެކަކުގެ ހާލު ދެރަވެގެން ފަރުވާ ދޭން ފަށައިފިއެވެ.

"ރަސް އޮންލައިން"އަށް މައުލޫމާތު ލިބިފައިވާ ގޮތުގައި ފުވައްމުލަކު ނެރު ކައިރިއަށް ޑައިވިނަށް ގޮސް އުޅެނިކޮށް ގެއްލިގެން ހޯދަމުންދަނީ އެ ރަށުގައި ޑައިވިން އިންސްޓްރަކްޓަރެއްގެ ގޮތުގައި ހަރަކާތްތެރިވާ މުހައްމަދު ސައީދު ނަމަކަށް ކިޔާ މީހެކެވެ.

އެމްއެންޑީއެފުން ބުނީ އޭނާ ހޯދުމުގެ މަސައްކަތް ކޯސްޓްގާޑުން ކުރަމުން އަންނަކަމަށެވެ. އަދި އެ ރަށުގެ އެހެން ޑައިވަރުންވެސް ދަނީ އެ މަސައްކަތުގައި ބައިވެރިވަމުންކަމުގެ މައުލޫމާތު ލިބެއެވެ.

"ރަސް އޮންލައިން" އަށް މައުލޫމާތު ލިބިފައިވާ ގޮތުގައި ސައީދާއެކު ޑައިވިނަށް ފޭބި މީހާގެ ހާލު ދެރަވެގެން އަންނަނީ ފަރުވާ ދެމުންނެވެ.