ހުޅުމާލޭގެ އިރުމަތީ ފަރާތު ފަރު ބޭރުގައި ސާވޭތަކެއް ކުރަމުން ދަނިކޮށް "އޯޝަން ސާވެޔާ" ކިޔާ އުޅަނދަކުން ފަރަށް ލިބުނު ގެއްލުންތަކާ ގުޅިގެން ޖޫރިމަނާކޮށްފި އެވެ.

އެންވަޔަރަަމަންޓް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ ފަރަށް ލިބުނު ގެއްލުންތަކާ ގުޅިގެން ޖޫރިމަނާކުރީ 198،112.73 ރުފިޔާއިން ކަމަށެވެ. އަދި އެ ފައިސާ މަސް ދުވަހުގެ ތެރޭގައި ދެއްކުމަށް އެ އުޅަނދުގެ ރާއްޖޭގެ އޭޖެންޓު، އެންޓްރެކް ހޯލްޑިން ޕްރައިވެޓް ލިމިޓެޑަށް އިއްޔެ އީޕީއޭއިން ވަނީ އަންގާފައެވެ.

އަދި އެކުންފުނި ޖޫރިމަނާކުރީ "އޯޝަން ސާވެޔާ" ގައި ބޭނުންކުރަމުން އައި ސިސްޓަމްގެ ޕޯލާއި އެ އުޅަނދުގައި ހަރުކޮށްފައި ހުރި މަލްޓިބީމް އިކޯސައުންޑަރު ފަރުގައި ޖެހިފައިވާކަން އެ ފަރާތުން ފޮނުވި މައުލޫމާތުން އެނގިފައިވާތީ ކަމަށް އީޕީއޭއިން ބުނެފައިވެއެވެ.

އޭގެ އިތުރުން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ކޯސްޓްގާޑާއި ގުޅިގެން މިދިޔަ މަހުގެ 13 ގައި އެ ސަރަޙައްދަށް ފީނައިގެން ކުރި ސާވޭގައި ވެސް ފަރަށް ގެއްލުންތަކެއް ލިބިފައިވާކަން ފާހަގަކުރެވިފައިވާ ކަމަށް އީޕީއޭއިން ވަނީ ބުނެފައެވެ.