ޕޯސްޓު މެދުވެރިކޮށް ރާއްޖެ އެތެރެކުރި ގިނަ އަދަދެއްގެ ޕާޓީ ޑްރަގްސް އަތުލައިގެންފިއެވެ.

މޯލްޑިވްސް ކަސްޓަމްސް ސާވިސުން މިރޭ ބުނީ މި ތަކެތި އަތުލައިގެންފައިވަނީ މިދިޔަ މަހުގެ 28 ވަނަ ދުވަހު ވައިގެ މަގުން ރާއްޖެ ގެނައި ޕާރުސަލެއްގެ ތެރެއިން ކަމަށެވެ. އެ ޕާރުސަލްގެ ތެރެއިން 1.363 ކިލޯގެ މަސްތުވާތަކެތި އަތުލައިގެންފައިވާކަމަށް ކަސްޓަމުން ބުނެއެވެ.

ކަސްޓަމުން ބުނީ އެ ޕާރްސަލް ބަލާ ފާސްކުރުމުގެ ތެރޭގައި ފުރަތަމަ މަރުހަލާގައި ކަސްޓަމުން ތަހުލީލުކުރި އިރު، އޭގައި ހުރި ތަކެތި މަސްތުވާތަކެތީގެ ބާވަތެއް ކަމަށްވާ މެތްއެމްފަޓަމައިން އަށް ވަނީ ޕޮޒިޓިވް ވެފައިކަމަށެވެ.

ކަސްޓަމުން ބުނީ މިމަސްތުވާތަކެތީގެ މަގުމަތީ އަގު ފަސް ލައްކަ ރުފިޔާއަށްވުރެ ވެސް މަތިވާނެކަމަށް ބެލެވޭކަމަށެވެ. އަދި މި މައްސަލައާއި ގުޅޭ މީހަކު މިހާތަނަށް ހޯދިފައި ނުވާކަމަށާއި، އަދި މިފަހަރު އަތުލައިގަތް ތަކެތި މިހާރު ވާނީ ފުލުހުންނާ ހަވާލު ކޮށްފައި ކަމަށެވެ.

ރާއްޖެއަށް ވައިގެމަގުން ދޭތެރެ ދޭތެރެއިން މަސްތުވާތަކެތި އެތެރެކުރަން މަސައްކަތް ކުރެއެވެ. އެގޮތުން އެފަދަ ބައެއްފަހަރުތަކުގައި ޕާޓީ ޑްރަގްސް އެތެރެ ކުރުމުގެ މައްސަލަތައް ފަޅާ އަރައި ގިނަ އަދަދެއްގެ މަސްތުވާތަކެތި އަތުލައިގެންފައިވެސް ވެއެވެ.