އީދު ދުވަހު މާލޭގައި ހިނގި މާރާމާރީތަކާއި ގުޅިގެން އިތުރުމީހަކު ހައްޔަރުކޮށްފިއެވެ.

އީދު ދުވަހު މާލޭގެ ދެ ސަރަޙައްދެއްގައި ވަނީ މާރާމާރީތަކެއް ހިނގާފައެވެ. ފުރަތަމަ މާރާމާރީ ހިންގާފައިވަނީ ކޯރުކެނޑި މަގުން މާވެޔޮ މިސްކިތް ކައިރީގައެވެ. އީދު ދުވަހު ފަތިހު 5:48 ހާއިރު ހިންގި އެ މާރާމާރީގައި 23 އަހަރުގެ ދިވެއްސަކަށް ވަނީ ތޫނު އެއްޗަކުން ހަމަލާދީފައެވެ.



ދެވަނަ މާރާމާރީ ހިންގާފައިވަނީ ޖަނަވަރީމަގާއި މަޖީދީމަގު ގުޅޭ ކަންމަތީގައެވެ. އީދު ދުވަހު ހެދުނު 9:17 ހާއިރު ހިންގި އެ މާރާމާރީގައި ދެ މީހަކު ޒަހަމްކޮށްލައިފައިވާ ކަމަށް ފުލުހުން މައުލޫމާތުދެއެވެ.

ފުލުހުން ބުނީ އީދު ދުވަހުގެ މާރާމާރީތަކާއި ގުޅިގެން އިތުރު މީހަކު ހައްޔަރުކޮށްފައިވާ ކަމަށެވެ. އެގޮތުން ގއ. ގެމަނަފުށީ ކެނެރީގޭ އަހުމަދު ނާޒިހު، 27، ހައްޔަރުކޮށް އޭނާގެ ބަންދާ މެދު ގޮތެއް ނިންމަން ކޯޓަށް ގެންދިއުމުން 15 ދުވަހުގެ މުއްދަތެއް ދީފައިވާ ކަމަށެވެ.

މީގެ ކުރިން ފުލުހުންވަނީ މިމައްސަލައިގެ ތުހުމަތުގައި ތ. ތިމަރަފުށި ސީނުގެ، އަޙްމަދު ޝިމްހާޒު (22އ) އާއި ކ. މާލެ މ. ލޮނުމިދިލިގެ، ލޫޠު އަޙްމަދު އާސިފް (18އ) ގެ އިތުރުން ގދ. ވާދޫ އުނިމާގެ، ޙަސަން ޒިޔާން އިބްރާހިމް (18އ) އާއި 15 އަހަރުގެ ކުޑަ ކުއްޖަކު ހައްޔަރުކޮށްފައެވެ.

ފުލުހުން ބުނީ މި މައްސަލައިގައި ހިމެނޭ 4 މީހަކު ހޯދުމުގެ މަސައްކަތް އަދިވެސް ކުރަމުންދާކަމަށެވެ.