އެމްޑީޕީގެ ޗެއަރޕާސަންގެ މަގާމަށް ހޮނިހިރު ދުވަހު އިންތިހާބުވެވަޑައިގެންންނެވި ފައްޔާޟް އިސްމާއިލްގެ އުފަންދުވަސް ފާހަގަކުރުމަށް ކޭކް ފެޅުމުގެ ރަސްމިއްޔާތެއް އެމްޑީޕީގެ އޮފީހުގައި ބާއްވައިފިއެވެ.

މި ރަސްމިއްޔާތުގައި ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުވެސް ބައިވެރިވެވަޑައިގެންނެވިއެވެ.

އަނެއްކޮޅުން މިއީ ވާދަވެރި އިންތިހާބަށްފަހު ފައްޔާޟާއި ރައީސް ނަޝީދު އެއްތަނަކުން ބައްދަލުވެ ވަޑައިގެންނެވި ފުރަތަމަ ފަހަރެވެ.

ކޭކް ފެޅުމުގެ ރަސްމިއްޔާތަށްފަހު ރައީސް ނަޝީދާއި ފައްޔާޒް ވަނީ ބައްދަލުވުމެއްވެސް ބާއްވަވާފައެވެ.

ޕާޓީގެ ރައީސް، ރައީސް @MohamedNasheed،
ޗެއަރޕާސަން އިލެކްޓް އަލްއުސްތާޛް @faya_i، ޑެޕިއުޓީ ޗެއަރޕާސަން @ali_niya އެމްޑީޕީ ސެކްރެޓޭރިއެޓްގަ pic.twitter.com/mHtSvJtzM6

— MDP Secretariat (@MDPSecretariat) May 16, 2022

ހޮނިހިރު ދުވަހު ބޭއްވި އިންތިހާބު ކާމިޔާބުކޮށް އެމްޑީޕީގެ ޗެއަރޕާސަންގެ މަގާމަށް ފައްޔާޟް އިސްމާއިލް އިންތިހާބުވެވަޑައިގަތީ، ބޮޑު ތަފާތަކުންނެވެ.

އެމްޑީޕީގެ ޗެއާޕާސަން އިންތިހާބު ފައްޔާޒު ކާމިޔާބު ކުރެއްވީ އިންތިހާބުގައި ވޯޓް ދިން މީހުންގެ 58 ޕަސެންޓް ވޯޓާއެކުއެވެ. އިންތިއަށް ލިބިވަޑައިގަތީ 42 ޕަސެންޓް ވޯޓެވެ.

ރައީސް ނަޝީދު އިއްޔެ ވަނީ ފައްޔާޟް ހޯދި ކާމިޔާބީ ފާހަގަކުރަށްވަެި، މަރުހަބާ ވިދާޅުވެފައެވެ. އެމަނިކުފާނުގެ މެސެޖުގައި ވަނީ ފަޔާއާއި ފަޔާގެ ކެމްޕޭން ޓީމަށާއި އަދި އިންތިއާއި އިންތިގެ ކެމްޕޭން ޓީމަށްވެސް ވަރަށް ބޮޑަށް މަރުހަބާ ވިދާޅުވެފައެވެ. އަދި ފަޔާގެ ޗެއަރޕާސަންކަމުގައި އެމްޑީޕީއަށް އިތުރު ކާމިޔާބީ ހޯދޭނެކަމާމެދު އެމަނިކުފާނުގެ ހިތްޕުޅުގައި ޝައްކު ނުހިނގާކަމަށް ވިދާޅުވިއެވެ.