71 ކިލޯގެ ހެރޮއިންގެ މައްސަލާގައި ހައްޔަރުކޮށްފައިވާ މީހަކު މިނިވަންވެއްޖެއެވެ.

ފަރީދީ މަގު ބަންދުކޮށްގެން 2020 ވަނަ އަހަރުގެ ޑިސެމްބަރު 8 ވަނަ ދުވަހު ފުލުހުން ކުރިއަށް ގެންދިޔަ މަސްތުވާތަކެތީގެ ބޮޑު އޮޕަރޭޝަންގައި އަތުލައިގަތް 71 ކިލޯގެ މަސްތުވާތަކެތީގެ މަގުމަތީއަގު 71 މިލިއަން ރުފިޔާ އަށް އަރައެވެ. އެތަކެތި ހުރީ 2 ގޯންޏެއްގައާއި 2 ލަގެޖެއްގައެވެ. އަދި މައްސަލައާއި ގުޅިގެން 10 މީހަކު ހައްޔަރުކޮށްފައިވާ ކަމަށްވެސް ފުލުހުން ވަނީ ބުނެފައެވެ.

މި މައްސަލާގައި ހިމެނޭ މީހަކު މިނިވަންވެފައިވަނީ ދަޢުވާކުރަންޖެހޭ މުއްދަތު އިތުރުކުރުމުގައި ދައުލަތުންނާއި ފުލުހުން އަމަލުކޮށްފައިގޮތުގެ ސަބަބުންނެވެ. ޖިނާޢީ އިޖުރާއާތުގެ ޤާނޫނުގެ 94 ވަނަ މާއްދާގައި ބަޔާންކޮށްފައިވަނީ ޖިނާއީ ބޮޑެތި މައްސަލަތަކުގައި ތަހުގީގު ނުނިމޭކަމުގައިވާނަމަ، ތަހުގީގު މުއްދަތު އިތުރުކޮށްދިނުމަށްއެދި ފުލުހުންގެ ފަރާތުން ހުށަހެޅުމުން، އެހުށަހެޅުމަށްބަލައި ތަހުގީގު މުއްދަތު ޕްރޮސެކިއުޓަރ ޖެނެރަލްއަށް އިތުރު ކުރެވިދާނެ ކަމަށެވެ. އެހެންނަމަވެސް، އެގޮތަށް އިތުރުކުރެވޭނީވެސް ގިނަވެގެން 30 ދުވަހެވެ. އެހެންކަމުން ތަޙުޤީޤު މަރުޙަލާގައި ފުލުހުންނަށް ލިބެނީ ޖުމްލަ 60 ދުވަހެވެ.

މި މައްސަލާގައި ދެ ފަހަރަކު ތަހްގީގު މުއްދަތު އިތުރުކޮށްދީފައިވާއިރު ފުލުހުންގެ ފަރާތުން ތަހްގީގު މުއްދަތު އިތުރުކޮށްދިނުމަށް ފަހުން ހުށަހެޅި ފޯމާއި ފުރަތަމަ ހުށަހެޅި ފޯމުގައި އޮތީ އެއް ތާރީޚެކެވެ. އެހެންކަމުން ފުލުހުން އިޖުރާއަތާ ޚިލާފުވުމުގެ ސަބަބުން އެ މައްސަލާގައި ހިމެނޭ މީހާ ވަނީ މިނިވަންވެފައެވެ.

ފަހަކަށް އައިސް ފުލުހުން ގެންދަނީ މަސްތުވާތަކެތީގެ ބޮޑެތި އޮޕަރޭޝަންތައް ހިންގައި، ބޮޑެތި ޢަދަދުތަކުން މަސްތުވާތަކެތި އަތުލައިގަންނަމުންނެވެ. ނަމަވެސް މައްސަލަތަކުގައި ހައްޔަރުކުރާ މީހުންގެ ތަހުޤީޤު މަރުޙަލާގައި ފުލުހުންހަދާ ބޮޑެތި ގޯސްތަކުގެ ސަބަބުން ކޯޓު މަރުޙަލާއިން މިނިވަންވާކަމުގެ ކަންބޮޑުވުން ޢާއްމުން ދަނީ ކުރަމުންނެވެ.