ދުނިޔޭގެ ތިމާވެށީގެ ދުވަސް ފާހަގަކުރުމަށް ޚާއްސަ ދުވުމެއް ފުވައްމުލައް ސިޓީގައި ކުރިއަށް ގެންގޮސްފިއެވެ.

އެންވަޔަރަންމަންޓް މިނިސްޓްރީ އާއި ފުވައްމުލަކު ސިޓީ ކައުންސިލް ގުޅިގެން މިއަދު 06:30 ގައި މިދުވުން ކުރިއަށް ގެންގޮސްފައިވަނީ ފުވައްމުލައް ސިޓީގެ ސްޓޭޑިއަމް ސަރަހައްދުގައެވެ. ތިމާވެށީގެ ދުވަސް ފާހަގަކުރުމުގެ ގޮތުން މިއަދު ހަވީރު ޚާއްސަ ބައިސްކަލު ބުރެއްވެސް ފުވައްމުލައް ސިޓީގައި ބޭވުމަށް ވަނީ ހަމަޖެހިފައެވެ.

"އޮންލީ ވަން އާރތް ރަން"ގެ ނަމުގައި ކުރިއަށް ގެންދިޔަ މިދުވުމުގައި ފުވައްމުލަކު ސިޓީގެ މޭޔަރާއި ސަރުކާރުގެ މުއައްސަސާތަކުގެ މުވައްޒަފުންނާއި ތިމާވެއްޓާބެހޭ ވުޒާރާގެ ބޭފުޅުން ބައިވެރިވެވަޑައިގެންނެވިއެވެ.

މި ދުވުމުގެ މައިގަނޑު މަޤްޞަދަކީ ދުޅަހެޔޮ ސިއްހަތެއްގައި ހުރުމަށް ބާރު އެޅުމާއި ތިމާވެއްޓާމެދު ޢާއްމުން އަހުލުވެރިކުރުވުމެވެ. މި ދުވުމުގައި 250 މީހުން ވަނީ ރަޖިސްޓްރީވެފައެވެ. މީގެއިތުރުން މި ދުވުން ފުރިހަމަކުރި ކޮންމެ ބައިވެރިޔަކަށް ތިމާވެއްޓާއި ރައްޓެހި ސާމާނުތައް ހިމެނޭ ގިފްޓް ޕެކެއް ވަނީ ދީފައެވެ.

ދުނިޔޭގެ ތިމަވެށީގެ ދުވަސް ފާހަގަކުރަނީ ކޮންމެ އަހަރެއްގެވެސް ޖޫންމަހުގެ 5 ވަނަ ދުވަހުއެވެ. މިއަހަރުގެ މިދުވަހުގެ ޝިއާރަކީ "އޮންލީ ވަން އާރތް-ލިވިން ސަސްޓެއިނަބްލީ އިން ހާމަނީ ވިތް ނޭޗަރ"އެވެ.

ދުނިޔޭގެ ތިމާވެށީގެ ދުވަސް ފާހަގަކުރުމަށް ބާއްވާ ރަސްމީ ޖަލްސާ އޮންނާނީ މިރޭ ފުވައްމުލައް ސިޓީގައެވެ.