ތޫނު އެއްޗަކުން ހަމަލާދީ މަރާލާފައިވާ އައްޑޫ ސިޓީ ފޭދޫ ސޮލިޑް މުހައްމަދު ޒަޔާން މޫސާ (21އ.)ގެ މަރުގެ މައްސަލައާ ގުޅިގެން އިތުރު ޒުވާނަކު ފުލުހުން ހައްޔަރު ކޮށްފިއެވެ.

ފުލުހުން މިއަދު ބުނީ ޒަޔާންގެ މަރުގެ މައްސަލައިގައި ކޯޓު އަމުރެއްގެ ދަށުން މިއަދު ހައްޔަރު ކުރީ 15 އަހަރުގެ ފިރިހެން ކުއްޖެއް ކަމަށެވެ. މި މަރާ ގުޅިގެން ރޭ ވެސް ވަނީ އުމުރުން 16 އަހަރުގެ ކުއްޖަކު ހައްޔަރު ކޮށްފައެވެ. އަދި 16 އަހަރުގެ ކުއްޖާގެ ބަންދަށް 10 ދުވަސް ކޯޓުން ޖަހައިދީފައިވާ ކަމަށް ވެސް ފުލުހުން ބުނެއެވެ.

މީގެއިތުރުން ރަށުތެރޭގެ އަމާންކަން ނަގާލަން އުޅުމުގެ ތުހުމަތުގައި ރޭ ހައްޔަރުކުރި 18 އަހަރުގެ ދެ މީހުންނާއި 29 އަހަރުގެ މީހާގެ ބަންދަށްވެސް 5 ދުވަސް ކޯޓުން ޖަހާފައިވާ ކަމަށް ފުލުހުން ބުނެފައިވެއެވެ.

މަރާލި ޒަޔާންގެ ގައިގެ އެތައް ތަނަކަށް ވަނީ ތޫނުއެއްޗަކުން ހަމަލާދީފައެވެ. ހޮސްޕިޓަލާއި ހަވާލާދީ މީގެ ކުރިން ފުލުހުން ބުނެފައިވަނީ އޭނާގެ އަތުގެ މުލައްދަނޑިއަށާއި ބުރަކަށްޓަށް ތޫނު އެއްޗަކުން ހަމަލާ ދީފައިވާކަމަށެވެ.

މިކަމާއި ގުޅިގެން އައްޑޫ ސިޓީ ކައުންސިލުންވަނީ ނޫސްބަޔާނެއް ވެސް ނެރެފައެވެ. އެ ބަޔާނުގައި ކައުންސިލުންވަނީ އެ ސިޓީގެ އަމަން އަމާންކަން ބަލަހައްޓައިދެއްވުމަށް ފުލުހުންނަށް ގޮވާލާފައެވެ.