ކޯޓު އެޑްމިނިސްޓްރޭޓަރުންގެ މަސައްކަތުގެ ފެންވަރު ބެލިއިރު ޗީފް އެޑްމިނިސްޓްރޭޓަރުގެ މަގާމަށް ބަދަލުވުމަށް ޝަރުތު ހަމަވާވަރަށް މާކްސް ނުލިބުނު 10 މުވައްޒަފުން ވަޒީފާއިން ވަކިކުރި މައްސަލަ ހައިކޯޓުގައި ތާވަލުކޮށްފިއެވެ.

މި މައްސަލައިގެ އަޑުއެހުންތައް ހައިކޯޓުގައި ތާވަލުކޮށްފައިވަނީ މިއަދު 11:30 އަށެވެ.

ޝަރުއީ ކޯޓުތަކުގެ އިދާރީ ހިންގުމުގެ އުސޫލަށް ގެނެސްފައިވާ ބަދަލުގެ ދަށުން ކޯޓުތައް ކްލަސްޓަރތަކަކަށް ބަހާލައި، އަލަށް އުފެއްދި ޗީފް އެޑްމިނިސްޓްރޭޓަރުގެ މަޤާމުގެ މަސްއޫލިއްޔަތު ބައެއް ކޯޓުތަކުގައާއި ޖުޑީޝަލް ދާއިރާގައި ތިއްބެވި ކޯޓު އެޑްމިނިސްޓްރޭޓަރުންނާ ހަމަސްދުވަހަށް ހަވާލު ކުރުމަށް ޖޭއެސްސީން ނިންމިއެވެ.

އަދި ޗީފް އެޑްމިނިސްޓްރޭޓަރުގެ މަޤާމުގެ މަސްއޫލިއްޔަތުގެ ޒިންމާ އަދާކުރާ ގޮތް ބެލުމަށް ވަށައިޖެހޭ އެޕްރައިޒަލް ނިޒާމެއް ތައާރަފްކޮށް އެ ނިޒާމުގެ ތެރެއިން މުވައްޒަފުންގެ މަސައްކަތުގެ ފެންވަރު ވަޒަންކުރިއިރު 70 ޕަސެންޓަށްވުރެ ދަށުން މާކްސް ލިބުނު 10 މުވައްޒަފުން ތިބި ކަމަށް ޑީޖޭއޭ އިން ވަނީ ބުނެފަ އެވެ.

އޭގެތެރެއިން ހަތްދިހަ އިންސައްތަ މާކްސް ނުލިބޭ 10 މުވައްޒަފުން ވަނީ މަގާމުން ވަކިކޮށްފައެވެ. އޭގެ ތެރޭގައި މާލޭގައި ގާއިމް ކޮށްފައިވާ ސުޕީރިއާ ކޯޓުތަކުގެ އިތުރުން ހައިކޯޓާ އަދި އެހެން ބައެއް ކޯޓުތައް ހިމެނެއެވެ.