ނ. ލަންދޫ ބަނދަރުގައި އޮތް ލޭންޑިން ކްރާފްޓަކަށް ރުއްތަކެއް އެރުވުމުގެ ތެރޭގައި ދެރުއް ދޭތެރޭ ތާށިވެ މީހަކު މަރުވެއްޖެއެވެ.

ފުލުހުން ދެންމެ ބުނީ، ނ. ލަންދޫގައި ލޭންޑިންގ ކްރާފްޓަކަށް ރުއްތަކެއް އެރުވުމުގެ މަސައްކަތް ކުރަމުން ދިޔަ އުމުރުން 53 އަހަރުގެ ބަންގްލަދޭޝް މީހަކު 2 ރުއް ދޭތެރޭ ފިތިފައިވާ ކަމުގެ މައުލޫމާތު މިއަދު ހަވީރު 4:15 ގައި ފުލުހުންނަށް ލިބިފައިވާ ކަމަށެވެ.

އަދި އެ ރަށު ސިއްހީ މަރުކަޒާއި ހަވާލާދީ ފުލުހުން ބުނީ، އޭނާ ސިއްހީ މަރުކަޒަށް ގެންދިޔައިރު ވެސް މަރުވެފައިވާކަމަށް އެ މަރުކަޒުން ބުނެފައިވާކަމަށެވެ.

ފުލުހުން ބުނީ މި ހާދިސާއާއި ގުޅިގެން ބަލަންޖެހޭ ކަންކަން ބަލަމުން ދާކަމަށެވެ.