އާދިއްތަ ދުވަހު ހއ. އަތޮޅުގައި ހައި ސްޕީޑް ފެރީގެ ޚިދުމަތް ފަށާއިރު ފެރީގެ ހިދުމަތުން އެއްވެސް އަގެއް ނުނަގާނެކަމަށް މިނިސްޓްރީ އޮފް ޕްލޭނިންގ، ހައުސިންގ އެންޑް އިންފްރާސްޓްރަކްޗަރުން ހާމަކޮށްފިއެވެ.

އާދިއްތަ ދުވަހު ހއ. އަތޮޅުގައި ހައި ސްޕީޑް ފެރީގެ ޚިދުމަތް ފެށުމަށް ތައްޔާރުވެފައިވާއިރު މިމަސައްކަތް ސަރުކާރުން ހަވާލުކޮށްފައިވާ އެމްޓީސީސީން ބުނީ ހއ. އަތޮޅުގައި ޚިދުމަތް ދިނުމަށް ޖުމްލަ ފަސް ފެރީ ބޭނުންކުރާނެ ކަމަށެެވެ. އަދި އެ ފަސް ފެރީ މާލެއިން އެ އަތޮޅަށް އިއްޔެ ވަނީ ފުރާފައެވެ.

ރާއްޖެ ޓްރާންސްޕޯޓް ލިންކަށް އަހުލުވެރިކުރުމުގެ ދަތުރުތައް ހއ އަތޮޅުގައި 26 ޖޫން 2022 ގައި ފެށުމަށް ވަނީ ހަމަޖެހިފައި.

ދަތުރުތައް ކުރުމަށް ރަށު ކައުންސިލް މެދުވެރިކޮށް ނަންނޯޓު ކުރެވޭނެ. އަދި މި ދަތުރުތަކަށް އެއްވެސް އަގެއް ނުނެގޭނެ. #gaumeeferry #connectingraajje pic.twitter.com/jhTyLjQsJZ

— Min.of National Planning, Housing & Infrastructure (@MoNPHImv) June 25, 2022

އެމްޓީސީސީން ބުނީ އެ ފެރީތައް މިއަދު ހއ. އަތޮޅުގައި ބަނދަރު ކުރާނެ ކަމަށާއި، އާދީއްތަ ދުވަހު ރަސްމީކޮށް ދަތުރުތައް ފަށާނެކަމަށެވެ. އަދި މާދަމާ ފަށާނީ ރާއްޖެ ޓްރާންސްޕޯޓް ލިންކަށް އަހުލުވެރިކުރުމުގެ ދަތުރުތައްކަމަށާއި، ދަތުރުތައް ކުރުމަށް ރަށު ކައުންސިލް މެދުވެރިކޮށް ނަންނޯޓު ކުރެވޭނެކަމަށް މިނިސްޓްރީން ބުނެއެވެ. މީގެއިތުރުން މި ދަތުރުތަކަށް އެއްވެސް އަގެއް ނުނަގާނެކަމަށްވެސް ހައުސިންގ މިނިސްޓްރީން ބުނެފައި ވެއެވެ.

ހައި ސްޕީޑް ފެރީގެ ޚިދުމަތްދޭ އާރުޓީއެލް ފެރީގެ ނިޒާމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ވައުދެކެވެ.

އެ ޚިދުމަތް މި މަހުގެ 12 ވަނަ ދުވަހު ހދ. އަތޮޅުން ވަނީ ރަސްމީކޮށް ފަށާފައެވެ. އޭގެ ކުރިން، މިދިޔަ މަހުގެ ދެވަނަ ދުވަހުން ފެށިގެން މި މަހުގެ 11 ވަނަ ދުވަހުގެ ނިޔަލަށް އެ އަތޮޅުގައި ޓެސްޓު ދަތުރުތަކެއް ވަނީ ކޮށްފައެވެ. އަދި މި ދަތުރުތަކުގައި އެއްވެސް އުޖޫރައެއް ދަތުރުވެރިންގެ އަތުން ނަގާފައި ނުވާ ކަން ފާހަގަކުރެވެއެވެ.