ޑެންމާކުގެ އެންމެ ބޮޑު އެއް ޝޮޕިން މޯލަށް މީހަކު ބަޑިން ދިން ހަމަލާއެއްގައި ތިން މީހަކު މަރުވެފައިވާ ކަމަށް ފުލުހުން ބުނެފި އެވެ.

ކޯޕަންހޭގަންގެ ދެކުނުގެ ސަރަހައްދެއްގައި ހުންނަ، ފީލްޑްސް މޯލްގައި ދިން މި ހަމަލާގައި އެތައްބަޔަކަށް އަނިޔާވެފައިވާއިރު މިހަމަލާގެ ތުހުމަތުގައި 22 އަހަރުގެ ފިރިހެނަކު ވަނީ މިހާރު ހައްޔަރުކޮށްފަ އެވެ. ނަމަވެސް އޭނާ މި ހަމަލާ ދިން ސަބަބު އަދި ސާފު ނުވާ ކަމަށް ކޯޕަންހޭގަންގެ ޕޮލިސް ޗީފް، ސޮރެން ތޯމަސަން ވިދާޅުވެފައިވެއެވެ. އަދި ބެލެވޭ ގޮތުގައި މިހަމަލާއަކީ ޓެރަރިޒަމްގެ އަމަލެއް ކަމަށް އޭނާ ވަނީ ތުހުމަޔު ކުރައްވާފައެވެ.

މިހާދިސާ އާއި ގުޅިގެން ޑެންމާކުގެ ބޮޑުވަޒީރު މެޓް ފްރެޑެރިކްސަން ވިދާޅުވީ މިއީ ޑެންމާކަށް ދިން އަނިޔާވެރި ހަމަލާއެއް ކަމަށެވެ. އަދި ކުޑަވަގުތުކޮޅެއްގެ ތެރޭގައި އަމާންކަން ނައްތައިލައިފިކަމަށެވެ.

"އަހަރެމެންގެ މި އަމާން ރައްކާތެރި މާހައުލު ބަދަލުވީ ސިކުންތުކޮޅެއްގެ ތެރޭގައި،" ބޮޑުވަޒީރު ވިދާޅުވިވެ.

މީގެއިތުރުން، ޑެންމާކުގެ ޝާހީ އާއިލާއިން ވަނީ މަރުވި މީހުންގެ އާއިލާ ތަކަށް ތަޢުޒިޔާ ވިދާޅުވެ ހަމްދަރުދީގެ މެސެޖު ފޮނުއްވާފައެވެ.

ޝޮޕިން މޯލަށް ދިން މިހަމަލާ ވެގެންދިޔައީ 2015 ވަނަ އަހަރަށްފަހު ޑެންމާކުގައި ދިން އެންމެ ނުރައްކާތެރި ހަމަލާއަށެވެ. 2015 ވަނަ އަހަރު ޑެންމާކުގެ ވެރިކަންކުރާ ސިޓީއަށް ދިން ބަޑީގެ ހަމަލާގައި ދެ މީހަކު މަރާލައި ފަސް ފުލުހަކު ޒަހަމްކޮށްލާފައިވެއެވެ.