ގައުމު ދަރަނިވެރިވެ ކާބޯތަކެއްޗާއި ތެލަށް ޖެހިފައިވާ ސްރީލަންކާއަށް މިމަހުގެ 15 ގެ ކުރިން ޕެޓްރޯލާއި ޑީސަލް ލިބޭނެކަމަށް ސަރުކާރުން ބުނެފިއެވެ.

ސްރީލަންކާގެ މިނިސްޓަރ އޮފް ޕަވަރ އެންޑް އެނާޖީ، ކަންޗަނާ ވިޖެސެކެރާ ވިދާޅުވީ މިމަހުގެ ފުރަތަމަ ދެ ހަފްތާގެ ތެރޭގައި ޑީސަލް ދެ ބޯޓު ސްރީލަންކާއަށް ބަނދަރުކޮށް ތެޔޮ ލިބެންފަށާނެ ކަމަށެވެ.

އެގޮތުން ޑީސަލް ދެ ޓޭންކަރު ޝިޕްމަންޓް މިހިނގާ ޖުލައި މަހުގެ 8 ނުވަތަ 9 ވަނަ ދުވަހު އަދި ޖުލައި 11 ނުވަތަ 14 ވަނަ ދުވަހު ސްރީލަންކާއަށް ފޯރާނެކަމަށް މިނިސްޓަރ ކަންޗަނާ ވިޖެސެކެރާ ވިދާޅުވެފައިވެއެވެ. އަދި ޕެޓްރޯލް ހިފައިގެން އަންނަ ބޯޓެއް މިމަހުގެ 22 ނުވަތަ 23 ވަނަ ދުވަހު ލަންކާއަށް އަންނާނެ ކަމަށްވެސް މިނިސްޓަރ ވިދާޅުވެފައިވެއެވެ. މިޕެޓްރޯލް ޝިޕްމެންޓަށް ފައިސާ ދައްކާފައިވާއިރު، ތިންވަނަ ޑީސަލް ޝިޕްމަންޓަކަށް އެޑްވާންސް ފައިސާ ދެއްކުމުން މިމަހުގެ މެދުތެރޭގައި ލަންކާއަށް އަންނާނެ ކަމަށް ވެސް މިނިސްޓަރު ފާހަގަ ކުރެއްވިއެވެ.

މީގެއިތުރުން، ޖުލައި މަހުގެ 10 ވަނަ ދުވަހު ނުވަތަ އެއަށްވުރެވެސް އަވަހަށް އިތުރު ޕެޓްރޯލް ޝިޕްމަންޓެއް ހޯދުމަށް މެލޭޝިޔާއާ އެކު މަޝްވަރާތައް ފަށާފައިވާ ކަމަށާއި، މިކަމާ ގުޅޭ ގޮތުން އިމްޕޯޓު ވިޔަފާރިކުރާ އާ ތިން ފަރާތަކާއެކު މަޝްވަރާތައް ކުރަމުންދާ ކަމަށްވެސް މިނިސްޓަރު ވިދާޅުވިއެވެ. އަދި ލަންކާއަށް ބޭނުންވާ ސާފުނުކުރާ ތެޔޮ ނުވަތަ ކްރޫޑް އޮއިލް ފޯރުކޮށްދިނުމަށް މެލޭޝިޔާގެ ތެޔޮ ކުންފުނި "ޕެޓްރޯނާސް" އާއި އެކުވެސް ސަރުކާރުން މަޝްވަރާކޮށްފައިވާކަމަށް މިނިސްޓަރު ފާހަގަ ކުރެއްވިއެވެ.

އިގްތިސާދީގޮތުން އަނދަވަޅަކަށް ވެއްޓިފައިވާ ލަންކާގައި ބޭހާއި، ކާބޯތަކެއްޗަށާއި ތެލައް ޖެހިފައިވާ މިދަނޑިވަޅުގައި، ޕެޓްރޯލާއި ޑީސަލް ފަދަ ތެލުގެ ބާވަތްތައް ވިއްކުން ހުއްޓާލައި ޒަރޫރީ ބޭނުން ތަކަށް ނޫން ގޮތަކަށް ތެޔޮ ދޫނުކުރަންވެސް ވަނީ ނިންމައިފައެވެ. އެގޮތުން ހުސްވި ހަފްތާގެ އަންގާރަ ދުވަހުން ފެށިގެން ފެށިގެން ދެހަފްތާގެ މުއްދަތަށް ފިއުލް ސަޕްލައި ކޮށްދިނުމުގެ އުސޫލަށް ބަދަލު ގެނެސްފައިވަނީ ތެލުގެ ދަތިކަން އިތުރުވެ ތެލަށްޖެހުމާއި ގުޅިގެންކަމަށް ސްރީލަންކާގެ ސަރުކާރުން ހުސްވިހަފްތާގައި ހާމަކޮށްފައިވެއެވެ.