އެފްރިކާ ބައްރުގައި އޮންނަ އަރަބި ޤައުމެއްކަމަށްވާ ތޫނިސްގެ ވެރިކަމުގެ ނިޒާމު ބަރުލަމާނީއަކުން ރިޔާސީ ނިޒާމަކަށް ބަދަލުކުރުމަށް ނަގާ ފެންނަ ނުފެންނަ ވޯޓު ނެގުމުގެ މަސައްކަތް ފަށައިފިއެވެ.

ތޫނިސްގައި އޮންނަ ބަރުލަމާނީ ނިޒާމު ރިޔާސީ ނިޒާމަކަށް ބަދަލުކުރުމުގެ މަސައްކަތް ފެށީ 2019 ވަނަ އަހަރުގެ އޮކްޓޯބަރުމަހު ތޫނިސްގެ ރައީސްކަމަށް އިންތިޚާބުވެ ވަޑައިގެން މަގާމާ ހަވާލުވެ ވަޑައިގެންނެވި ގައިސް ސައީދެވެ. އޭނާ ދެކެވަޑައިގަންނަވާ ގޮތުގައި ސިޔާސީ ޕާޓީތަކުގެ ކޯޅުންތަކާއި ޕާލަމެންޓް މެންބަރުން ބާރާއި ނުފޫޒު ދައުލަތުގެ ހުރިހާ މުއައްސަސާއެއްގެ މައްޗަށް ފޯރައި، ކޮރަޕްޝަނުގެ އަމަލުތައް ވަނީ ގިނަވެފައެވެ. އަދި މިކަންކަން ނިމުމަކަށް ގެނެސް ސިޔާސީ ކޯޅުންތަކާއި ކޮރަޕްޝަނުން ގައުމު ސަލާމަތް ކުރުމަށްޓަކައި ރިޔާސީ ނިޒާމަކަށް ބަދަލުކޮށް އައު ޤާނޫނުއަސާސީއެއް އެކުލަވާލަންޖެހޭކަމަށް އޭނާ ދެކެވަޑައިގަންނަވައެވެ. މިގޮތުން އޭނާގެ ސަރުކާރުން އަލަށް އެކުލަވާލި ޤާނޫނުއަސާސީގެ ދެލިކޮޕީ ވަނީ އާއްމުވެސް ކޮށްފައެވެ.

އައު ޤާނޫނުއަސާސީއާ މެދު ރައްޔިތުން ދެކޭ ގޮތް ބެލުމަށް ނަގާ ވޯޓްލުން މިއަދު ކުރިއަށްދާއިރު، މި އިންތިހާބުގައި ވޯޓްލާ މީހުންގެ އަދަދު ވަރަށް ބޮޑަށް މަދުވާނެކަމަށް ތަޖުރިބާކާރުން ޤަބޫލުކުރެއެވެ. އަނެއްކޮޅުން މި އިންތިހާބުގެ ނަތީޖާ ކޮންމެ ގޮތަކަށް އަޔަސް، އަަލަށް އެކުލަވާލި ޤާނޫނުއަސާސީ ތަންފީޒުކުރާނެކަމަށް ބެލެވޭކަމަށްވެސް ބައެއް ފަރާތްތަކުން ބުނެއެވެ.

ތޫނިސްގެ ވެރިކަމުގެ ނިޒާމަށް ގެންނަން ސަރުކާރުން މަސައްކަތްކުރާ ބަދަލަށް އެ ޤައުމުގެ ސިޔާސީ ފަރާތްތަކުންނާއި އާއްމުން ވަރަށް ބޮޑަށް ދަނީ ދެކޮޅު ހަދަމުންނެވެ. އެ މީހުން ބުނާގޮތުން އައު ޤާނޫނުއަސާސީގެ ދަށުން ރައީސަށް ބޮޑެތި ބާރުތަކެއް ލިބި، ހުދުމުހުތާރުވުމުގެ ފުރުޞަތު ވަރަށް ބޮޑުވެގެންދާނެއެވެ.

އިންތިހާބުގައި ވޯޓްލާ މީޙުންގެ އަދަދު މަދުވާނެކަމަށް ލަފާކުރިނަމަވެސް 12 މިލިއަންގެ އާބާދީއެއް އޮންނަ ތޫނިސްގެ 9 މިލިއަނެއްހާ މީހުން ވޯޓްލާން ރަޖިސްޓްރީކޮށްފައިވާކަމަށް ހަބަރުތައް ބުނެއެވެ. އަދި މިއިންތިހާބުގެ ނަތީޖާ އަންގާރަދުވަހުގެ ހެނދުނު އާއްމުކުރާނެކަމަށްވެސް ހަބަރުތައް ބުނެއެވެ.