އަފްޣާނިސްތާނުގެ ރެފިއުޖީންނަށް އިޓަލީ ވިލާތުން އެހީތެރިކަން ފޯރުކޮށްދޭން ނިންމައި، 300 އެއްހާ އަފްޣާނިސްތާނުގެ ރެފިއުޖީން އިޓަލީއަށްގެންގޮސް ހިމާޔަތް ދީފިއެވެ.

އިންސާނީ އެހީ ފޯރުކޮށްދިނުމުގެ މަގުސަދުގައި އިޓަލީން އަފްޣާނިސްތާނަށް އެހީތެރިވާން ނިންމާފައިވަނީ، ތާލިބާނުންގެ ބާރުގެ ދަށަށް އަފްޣާނިސްތާނު ދިއުމާއިގުޅިގެން، އަނިޔާވެރިކަމުން ސަލާމަތްވާން ރެފިއުޖީންގެ ގޮތުގައި އެގައުމުން ބޭރުވަމުންދާ އަފްޣާނިސްތާނު ރައްޔިތުންނަށް ރަނގަޅު މުސްތަގުބަލެއް ހޯދައިދިނުމަށްކަމަށް އިޓަލީގެ ފޮރިން މިނިސްޓްރީން ބުނެއެވެ.

މިދިޔަ އޮގަސްޓް މަހު އެމެރިކާގެ ސިފައިން އަފްޣާނިސްތާނުން ފޭބުމާ ގުޅިގެން އަފްޣާނިސްތާނުގެ އެތައް ހާސް ރައްޔިތުންނެއް އެގައުމުން ވަނީ ފައިބައިފައެވެ. މީގެތެރެއިން ގިނަ ބަޔަކަށް އަފްޣާނިސްތާނުގެ އަވަށްޓެރި ގައުމުތަކުން ވަނީ ވަގުތީގޮތުން ހިމާޔަތްދީ އެހީތެރިކަން ފޯރުކޮށްދީފައެވެ.

އިޓަލީގެ ފޮރިން މިނިސްޓްރީން ހާމަކޮށްފައިވާގޮތުގައި، އަފްޣާނިސްތާނުގެ ރެފިއުޖީންނަށް އެހީތެރިކަން ފޯރުކޮށްދިނުމުގެ ޕްރޮގްރާމުގެ ދަށުން 1200 އެއްހާ ރެފިއުޖީން އިޓަލީއަށް ގެނައުމަށް ވަނީ ހަމަޖެހިފައެވެ. އަދި މީގެ ތެރެއިން ގިނަ ރެފިއުޖީންނަކީ އީރާނާއި ޕާކިސްތާނުގެ އިތުރުން އަފްޣާނިސްތާނުގެ އަވަށްޓެރި އެހެން ގައުމުތަކުގައި ތިބި އަފްޣާނިސްތާނުގެ ރެފިއުޖީން ކަމަށެވެ. އަދި މީގެތެރޭގައި އަންހެނުންނާއި ކުޑަކުދިންނަށް އިސްކަން ދޭނެ ކަމަށް އިޓަލީން ބުނެއެވެ.

އިޓަލީ ސަރުކާރުން މިފަދަ ނިންމުމެއް ނިންމާފައިވަނި އަފްޣާނިސްތާނުގެ ރެފިއުޖީން އިންސާނުން ސްމަގްލް ކުރާ ރޫޓްތަކުން އިޓަލީއަށް އެތެރެވަމުންދާކަމަށް ރިޕޯޓު ކުރަމުންދާ ދަނޑިވަޅެއްގައެވެ. އެގޮތުން މިއަހަރުގެ މިހާތަނަށް ކަނޑުމަގުން އިޓަލީއަށް 3000 އެއްހާ މީހުން އައިސްފައިވާ ކަމަށް އދ.ގެ ރެފިއުޖީ އެޖެންސީން ބުނެއެވެ.