އިންޑިއާގައި ދީނީ ހަމަނުޖެހުން އުފެއްދުމުގެ މަގުސަދުގައި އުއްތަރު ޕްރަދޭޝްގެ ބިޖްނޯރުގައި 100 އަހަރު ވެފައިވާ އިސްލާމީ ތިން ޒިޔާރަތެއް ތަޅާލި ކަމަށް ތުހުމަތު ކުރެވޭ ދެބެއިން ފުލުހުން ހައްޔަރުކޮށްފި އެވެ.

މުސްލިމުންނަށް އަނިޔާވެރިވުމާއި، އިސްލާމް ދީނަށް ފުރައްސާރަ ކުރުން މިފަހަކުން އިތުރުވެފައިވާ ދަނޑިވަޅެއްގައި، އިތުރަށް ހާލަތު ގޯސް ކުރުމުގެ ނިޔަތުގައި އިންޑިއާގެ މުސްލިމުން މާތްކޮަށް ހިތަމުންދިޔަ ދުވަސްވީ މިތިން ޒިޔާރަތް ހަލާކުކޮށްލާފައިވަނީ މުޙައްމަދު ކަމާލް އާއި މުޙައްމަދު އަދީލް ނަމަކަށް ކިޔާ ދެބެއިންނެވެ.

މިހާދިސާ އާންމުވެގެންދިޔައީ އެއްޒިޔާރަތުގެ ކައިރީ ތިބި ބައެއް މީހުންނަށް ފެނިގެން، އެދެބެއިން ހުއްޓުވައި ފުލުހުންނަށް ރިޕޯޓުކުރި ހިސާބުންނެވެ. މަންޒަރު ދުށް މީހުން ހާމަކޮށްފައިވާ ގޮތުން މިދެބެއިން ޒިޔާރަތްތައް ދޮށުގައި އުޅުނީ ހިންދޫން ކަމަށް ހެދިގެންނެވެ.

ފުލުހުން ބުނީ މިހާދިސާ އާ ގުޅިގެން ހައްޔަރުކުރި އުމުރުން 35 އަހަރުގެ ކަމާލް، އަދި އުމުރުން 23 އަހަރުގެ މުހައްމަދު އަދީލް ވެސް ތިން ޒިޔާރަތަށް ގެއްލުން ދިންކަމަށް އިއުތިރާފުވެފައިވާ ކަމަށެވެ.

ހައްޔަރުކުރި މީހުންގެ މައްޗަށް ދައުވާކޮށްފައި ވަނީ ދެ ޖަމާއަތެއްގެ މެދުގައި ސުލްޙަމަސަލަސްކަން ނައްތާލައި، ތަންތަނަށް ގެއްލުން ދިނުމުގެ ނިޔަތުގައި އަލިފާން ނުވަތަ ގޮވާ މާއްދާއެއް ބޭނުންކުރުން ފަދަ ކަންކަމާއި، ދީނީ ގޮތުން ފުރައްސާރަކުރުމުގެ އަމަލު ހިންގި ކަމުގެ ދައުވާއެވެ.