އިނގިރޭސިވިލާތުގެ އައު ބޮޑުވަޒީރުގެ މަގާމުގެ ވާދަވެރި ރޭސް ހޫނުވަމުންދާއިރު ރިޝީ ސުނަކާއި ލިޒް ޓްރަސް ވެސް އެމީހެއްގެ އެޖެންޑާ ޕްރޮމޯޓް ކުރުމަށް ލިބޭ އެއްވެސް ފުރުސަތެއް ބޭކާރު ކޮށެއް ނުލައެވެ. ނަމަވެސް އާދިއްތަ ދުވަހު ކޮންޒަވޭޓިވް ޕާޓީގެ ލީޑަޝިޕްގެ އެންމެ ފަހުގެ ބަހުސް ކުއްލިއަކަށް ނިމުމަކަށް އައީ ޓީވީ ޕްރެޒެންޓަރު ކޭޓް މެކެން ހޭނެތިގެންނެވެ.

ބްރޯޑްކާސްޓްގެ މެދުތެރެއިން ހޯސްޓް ހޭނެތިގެން، ބްރޯޑްކާސްޓިންގ މެދުކަނޑާލަން ޖެހުމާއެކު ޓޯކްޓީވީން ވަނީ ހުރިހާ ބެލުންތެރިންގެ ކިބައިން ވެސް މައާފަށް އެދި، ބަޔާނެއް ނެރެފައެވެ.

މި ހާދިސާއަށް ފަހު ދެ ކެންޑިޑޭޓުން ވެސް ޓީވީ ހޯސްޓައް އަވަސް ޝިފާއަކަށްއެދި މެސެޖް ފޮނުވާފައިވެއެވެ.

ސެޕްޓެމްބަރު މަހުގެ ފަސް ވަނަ ދުވަހު ނަގަން ހަމަޖެހިފައިވާ ވޯޓުގެ ކުރިން ބާއްވާ ބަހުސްތަކުގައި ސުނާކާއި ޓްރަސް ވެސް ގަދަޔަށް ކެމްޕޭނު ކުރަމުންދާއިރު މިހާތަނަށް ބަހުސް ކުރެވުނު މައިގަނޑު މައުޟޫއުތަކަކީ ޓެކްހާއި ނެޝަނަލް ހެލްތު ސަރވިސަސްއަށް ބޭނުންވާ ފައިސާ ހޯދުމެވެ.

ލީޑަޝިޕް ރޭހުގެ ފުރަތަމަ ބޭއްވި ހުރިހާ ބުރެއްގެ ވޯޓުގައި އެންމެ ގިނަ ވޯޓާއެކު ސުނާކް އެއްވަނައިގަައި އޮތް ނަމަވެސް ފަސް ވަނަ ބުރުގައި ޓްރަސް ވަނީ ކުރި ހޯދާފައެވެ.