ކުޑަ ދުވަސްކޮޅަކަށް ސިންގަޕޫރަށް ވަޑައިގެންނެވި ސްރީލަންކާގެ ކުރީގެ ރައީސް ގޮޓަބަޔާ ރާޖަޕަކްސަ ސިންގަޕޫރުގައި ހުންނަވާ މުއްދަތު އިތުރުކުރައްވަން ނިންމައިފި އެވެ.

ރާޖަޕަކްސަ ސިންގަޕޫރަށް ވަޑައިގެންނެވީ މީގެ ދެ ހަފްތާ ކުރިން އަމިއްލަ ދަތުރުފުޅެއްގައެވެ. ސިންގަޕޫރުން އެމަނިކުފާނަށް ލިބިވަޑައިގެންނެވި ކުރު މުއްދަތުގެ ވިޒިޓް ޕާސް އިތުރު 14 ދުވަހަށް އިތުރުކޮށްފައިވާ ކަމަށް ސްޓްރޭޓްސް ޓައިމްސް ނޫހުން ވަނީ މިއަދު ކަށަވަރުކޮށްދީފަ އެވެ.



ރާޖަޕަކްސަ ސިންގަޕޫރުގައި ހުންނަވާ މުއްދަތު އިތުރުކުރައްވަން ނިންމާފައިމިވަނީ، ލަންކާގެ ކެބިނެޓްގެ ތަރުޖަމާނު ބަންޑޫލާ ގުނަވަރޑެނާ އަންގާރަ ދުވަހު ނޫސްވެރިންނާ ވާހަކަ ދައްކަވަމުން، ރާޖަޕަކްސަ ވަރަށް އަވަހަށް އެނބުރި ގައުމަށް ވަޑައިގަންނަވާނެ ކަމަށް ވިދާޅުވެފައިވަނިކޮށެވެ.

ޖުލައި 14 ވަނަ ދުވަހު ދިވެހިރާއްޖެ އިން ސައުދީގެ ފްލައިޓެއްގައި ރާޖަޕަކްސާ ސިންގަޕޫރަށް ވަޑައިގަތުމުން 14 ދުވަހުގެ ވަގުތީ ވިޒިޓިންގް ޕާސް އެއް ލިބިވަޑައިގެންފައިވާކަމަށް ރިޕޯޓުތައް ބުނެއެވެ. މިވަގުތީ ފާސްގެ މުއްދަތު އިތުރުކުރައްވަން އުޅުއްވާކަން ހާމަވެގެންދިޔައިރު، ފުރަތަމަ ރާޖަޕަކްސައަށް ލިބިވަޑައިގެންނެވި ވިޒިޓިންގް ޕާސް ނުވަތަ ވިޒިޓް ވިސާގެ މުއްދަތުވެސް ވަނީ ހަމަވާންކައިރިވެފައެވެ.