މޯލްޑިވްސް ކަރެކްޝަނަލް ސަރވިސްގެ ޖަލުތައް ބަލަހައްޓާ އޮފިސަރުންނަށް ހިންގި "ޓޭޒަރ އިންސްޓްރަކްޓަރ ކޯސް" ނިމިއްޖެއެވެ.

ކަރެކްޝަނުން ބުނީ މިއީ އިންސްޓިޓިއުޓް ފޮރ ކަރެކްޝަނަލް ސްޓަޑީޒް އާއި އެކްސޮން ކޮމްޕެނީ ގުޅިގެން ކުރިއަށްގެންދިޔަ ކޯހެއްކަމަށެވެ. މި ކޯހުގެ މަޤްޞަދަކީ މުސްތަޤްބަލުގައި ޖަލު ބަލަހައްޓާ އޮފިސަރުންނަށް ޓޭޒަރ އާއި ގުޅޭ ކްލާސްތައް ނަގައިދޭނެ މުދައްރިބުން އުފެއްދުމެވެ. މީގެ އިތުރުން ޒިންމާދާރުގޮތުގައި ޓޭޒަރ ބޭނުންކުރާނެ ގޮތްތައް މި ކޯހުގައި ކިޔައިދީފައިވެއެވެ.

މާފުށީ ޖަލުގައި އިއްޔެ ބޭއްވި ކޯސް ނިމުމުގެ ރަސްމިއްޔާތުގައި ކޯސް ފުރިހަމަކުރި 08 ފަރާތަށް ވަނީ ސެޓްފިކެޓް ހަވާލުކޮށްފައެވެ. މި ކޯހަކީ 03 ދުވަހުގެ މުއްދަތަށް ކުރިއަށް ގެންދިޔަ ކޯހެކެވެ. މި ކޯހުގެ ބައިވެރިންނަކީ އެމްސީއެސްގެ 4 އޮފިސަރުންނާއި މޯލްޑިވްސް ޕޮލިސް ސަރވިސްގެ 04 އޮފިސަރުންނެވެ.

ޓޭޒަރއަކީ ދުނިޔޭގައި ކުރިއަރަމުން އަންނަ ލޯ އެންފޯސްމަންޓް އޭޖެންސީތަކުގައި ބޭނުންކުރެވެމުން އަންނަ އާލާތެކެވެ. އަދި ޓޭޒަރ ބޭނުންކޮށްގެން އެންމެ ގެއްލުން ކުޑަ ގޮތަކަށް މީހުން ކޮންޓްރޯލް ކުރެވޭނެއެވެ. މި ކޯހުގެ ބައިވެރިންނަށް ކިޔަވައިދީފައިވަނީ އެކްސަން ކޮމްޕެނީގެ ސީނިއަރ އިންޓަރނޭޝަނަލް ޓްރޭނިންގ މެނޭޖަރ މރ. ނިކް ޑޭވީޒްއެވެ.

މި ރަސްމިއްޔާތުގައި ވާހަކަ ދައްކަވަމުން މރ. ޑޭވީޒް ވިދާޅުވީ ރައްކާތެރި އަދި ޒިންމާދާރުކަމާއެކު ޓޭޒަރ ބޭނުންކުރަން ދަސްވުމުން އޮފިސަރުންނަށް ރައްކާތެރިކަމާއި އަމާންކަން ކަށަވަރުކުރެވޭނެ ކަމަށެވެ. އަދި ޓޭޒަރ އެކުލެވިގެންވަނީ ވަރަށް ހައިޓެކްނޮލޮޖީގެ މައްޗަށްކަމަށާއި ރަނގަޅުގޮތުގައި ޓޭޒަރ ބޭނުންކުރުމަށްޓަކައި ތަމްރީނު ލިބިފައިތިބި އޮފިސަރުން ތިބުމަކީ މުހިއްމުކަމެއްކަމުގައި މރ. ޑޭވީޒް ވިދާޅުވިއެވެ.

ޓޭޒަރއާ ގުޅޭ މަޢުލޫމާތު ސެޝަނެއް ކަރެކްޝަންސް ސަރވިސްގެ މަސައްކަތްތައް މޮނިޓަރ ކުރާ މުވައްސަސާތަކަށްވެސް ވަނީ ކުރިއަށް ގެންގޮސްފައެވެ.