ދެކުނު ކޮރެއާގެ ވެރިރަށް ސޯލްގައި ހެލޮވީން ފާހަގަކުރަމުން ދިޔަ ބަޔަކު މަރުވި މައްސަލައިގައި ތަހުގީގު ކުރަމުންދާ ދެކުނު ކޮރެއާގެ ފުލުހަކު މަރުވެފައި އޮއްވާފެނިއްޖެއެވެ.

އުމުރުން 55 އަހަރުގެ އިންސްޕެކްޓަރ ޖެއޮންގް އަކީ ލޯކަލް ޕޮލިސް އާއި ގުޅިގެން މަސައްކަތް ކުރާ އިންޓެލިޖެންސް އޮފިސަރެކެވެ. އޭނާ މަރުވެފައި އޮއްވާ ފެނުނީ އޭނާ ދިރިއުޅޭ ގެއިންނެވެ. އަދި އޭނާ އަމިއްލައަށް މަރުވެފައިވާ ކަމަށް ޝައްކު ކުރެވޭކަމަށް ރިޕޯޓުތައް ބުނެއެވެ.

ޖެއޮންގް އަކީ ހެލޮވީން ފާހަގަ ކުރަން އެއްވި ބަޔަކު ހަނި މަގެއްގައި ތޮއްޖެހި، 156 މީހުން މަރުވެ، 196 މީހުން ޒަހަމްވި ހާދިސާގައި ފުލުހުން ދިން ރައްދުތަކާ ގުޅިގެން ކުރިއަށް ގެންދާ ތަހުގީގެއްގައި ތުހުމަތުތަކެއް ކުރެވޭ މީހެކެވެ. އެގޮތުން މިދިޔަ ބުދަ ދުވަހު އޭނާ ވަނީ، އެހާދިސާގައި ފުލުހުންގެ އިހުމާލުތަކެއް ފޮރުވަން އުޅުނުކަމުގެ ތުހުމަތުގައި ސަސްޕެންޑް ވެސް ކޮށްފައެވެ.

ދެކުނު ކޮރެއާގެ ވެރިރަށް ސޯލްގެ ނައިޓްލައިފް އޭރިއާގެ ހަނި މަގުތައްމައްޗަށް، ހެލޯވީން ފާހަގަކުރަން އެއްވި މީހުން ގިނަވެ، ތޮއްޖެހި، ފިތި ބާރުވެގެން މަރުވި މީހުންގެ ތެރޭގައި ކޮރެއާގެ އިތުރުން އެހެން ބައެއް ގައުމުތަކަށް ނިސްބަތްވާ މީހުން ހިމެނޭކަމަށްވެއެވެ. އަދި މިހާދިސާގައި މަރުވި މީހުންގެ ތެރޭގައި ޅަ ޒުވާން އުމުރުފުރާގެ މީހުން ހިމެނޭކަމަށްވެއެވެ.

މިހާދިސާ އާއި ގުޅިގެން މުޅި ލޯކަލް ޕޮލިސް ޑިޕާޓްމަންޓާއި ފަޔާ ސާވިސް އިން، މިހާދިސާއަށް އިޖާބަދިނުން ލަސްވުމާއި، ކައިރި މަގުތައް ބަލަހައްޓަން ތިބި ފުލުހުން އެހާދިސާއަށް އިޖާބަ ނުދިނުމާއި، އެމީހުން އަދާކުރި ދައުރު ތަހުގީގު ކުރަމުންދާކަމަށްވެއެވެ. އަދި މިހާދިސާގައި މަރުވި މީހުން އާއިލާތަކުން ދަނީ ފުލުހުން ޖަވާބުދާރީވުމަށް ގޮވާލައި، ހަގީގަތް ހާމަކުރުމަށް އެދެމުންނެވެ.