ޕާކިސްތާނުން ވަގަށް ނަގާފައިގާ 3.4 މިލިއަން ޑޮލަރުގެ 192 އާޓިފެކްޓްސް، އެމެރިކާއިން ޕާކިސްތާނަށް އަނބުރާ ފޮނުވާލައިފިއެވެ.

އެމެރިކާއިން ޕާކިސްތާނަށް އަނބުރާ ފޮނުވާލި ތަކެތީގެ ތެރޭގައި އަގުބޮޑެތި އެތައް ސާމާނެއް ހިމެނެއެވެ. މީގެ ތެރޭގައި މަޝްހޫރު އަގުބޮޑު ބުދެއް ހިމެނޭކަމަށްވެސް ވެއެވެ. މިތަކެތި ވަގަށް ނަގާފައިވަނީ 1990 ގެ އަހަރުތަކުގެ ތެރޭގައެވެ. އެގޮތުން ޕާކިސްތާނުން ވަގަށް ނަގައިގެން ނިއުޔޯކަށް މިތަކެތި ވަގަށް އެތެރެކުރިކަމަށް ރިޕޯޓުތައް ބުނެއެވެ.

ނިއުޔޯކުގައި ހުންނަ މެންހަޓަން ޑިސްޓްރިކްޓް އެޓާނީ (އެމްޑީއޭ)ގެ އޮފީހުން ވަނީ މި ޚަބަރު ކަށަވަރުކޮށްދީފަ އެވެ. މެންހަޓަން ޑިސްޓްރިކްޓް އެޓާނީ އަލްވިން އެލް ބްރެގް ޖޫނިއާ ވިދާޅުވަނީ ވަގަށް އެތެރެކޮށްފައިވާ މިސާމާނުތައް މިހާރު އަނބުރާ އެގައުމަށް ފޮނުވާލެވިފައިވާނެކަމަށެވެ.

އެމްޑީއޭގެ އޮފީހުން ހާމަކޮށްފައިވާގޮތުން ޕާކިސްތާނުން ވަގަށް ނަގާފައިވާ އަގުބޮޑު 192 އާޓިފެކްޓުގެ ތެރެއިން 187 އެތި އަތުލައިގަނެފައިވަނީ ސުބާޝް ކަޕޫރު ނަމަކަށް ކިޔާ މަޝްހޫރު ސްމަގްލާއެއްގެ އަތުންނެވެ. އަދި ބާކީ ތަކެތި ހޯދާފައިވަނީ، މިކަމާގުޅިގެން މިހާރު ކުރިއަށްދާ ކްރިމިނަލް އިންވެސްޓިގޭޝަނުގެ ތެރެއިން ކަމަށް އެމްޑީއޭއިން ހާމަކޮށްފައިވެއެވެ.

މިމައްސަލައިގައި މިހާތަނަށް 7 މީހަކު ވަނީ ވައްކަމުގެ ކުށް ސާބިތުވެ ޖަލަށްލާން ހުކުމްކޮށްފައެވެ.