އީރާނުގެ މަގުމަތީގައި ނަށާތަން ވީޑިއޯކޮށް އާންމު ކުރި ދެ ޒުވާނަކު 10 އަހަރަށް ޖަލަށްލާން ހުކުމްކޮށްފިއެވެ.

ޖުމުލަ 10 އަހަރާއި ހަމަސްދުވަހުގެ ޖަލު ހުކުމެއް އިއްވާފައިވަނީ ކައިވެންޏަށް ތައްޔާރުވަމުންދާ އުމުރުން 21 އަހަރުގެ އަސްތިއާޒް ހަގީގީ އަދި އުމުރުން 22 އަހަރުގެ އަމީރު މުހައްމަދު އަހުމަދީ އެކުގައި ނަށާތަން ވީޑިއޯކޮށް އާންމު ކުރިތާ މާގިނައިރެއް ނުވަނީހެވެ. ރިޕޯޓުތައް ބުނާގޮތުން މިދެ ޒުވާނުންގެ މައްޗަށް ސާބިތުވެފައިވަނީ ކޮރަޕްޝަނާއި ހަށިވިއްކުން ޕްރޮމޯޓްކުރުމާއި، ގައުމީ ސަލާމަތާ ދެކޮޅަށް ގުޅިގެން މަސައްކަތްކުރުމާއި، ސަރުކާރުގެ ގަވާއިދުތަކާއި ދެކޮޅަށް ޕްރޮޕެގެންޑާ ފެތުރުމުގެ ދައުވާއެވެ.

ނަމަވެސް މިދެޒުވާނުން އާންމު ކުރި ވީޑިއޯ އަކީ އީރާނުގައި އަންހެނުންނާއި، އަންހެނުން ބުރުގާ އެޅުމާއި ހެދުން އެޅުމާއި ދެކޮޅަށް ހިންގާ ހަރުކަށި ގަވާއިދުތަކާއި އެއްވެސް ގުޅުމެއް ނެތް ވީޑިއޯއެއްކަމަށްވެއެވެ.

އީރާނުގައި އަންހެނުންނާއި ދެކޮޅަށް އެޅިފައިވާ ހަރުކަށި ގަވާއިދުތަކާއި ދެކޮޅަށް އީރާނުގެ އިތުރުން ދުނިޔޭގެ އެކި ހިސާބު ތަކުގައި އަދިވެސް ދަނީ މުޒާހަރާ ކުރަމުންނެވެ. މިމުޒާހަރާތައް ފެށިގެން ދިއައީ އުމުރުން 22 އަހަރުގެ މަހްސާ އަމީނީ، ހެދުން އެޅުމުގެ ގަވާއިދާ ހިލާފުވި ކަމަށްބުނެ ފުލުހުންގެ ހައްޔަރުގައި އަނިޔާވެރިގޮތަކަށް މަރައިލުމާއިއެކުއެވެ.