ހއ. ދިއްދޫގައި އިސްލާމިކް ސެންޓަރެއް އިމާރާތްކުރުމަށް ބަޔަކާއި ހަވާލުކޮށްފިއެވެ.

އިސްލާމިކް މިނިސްޓްރީން މައުލޫމާތުދޭ ގޮތުގައި މި ސެންޓަރު އިމާރާތްކުރުމަށް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރުސީސީ) އާއެވެ. ދިއްދޫ އިސްލާމިކް ސެންޓަރު އިމާރާތްކުރުމުގެ އެއްބަސްވުމުގައި ކުންފުނީގެ ފަރާތުން ސޮއިކުރެއްވީ އާރުސީސީގެ ޑިރެކްޓަރ އާދަމް ރަޙީމެވެ. އިސްލާމިކް މިނިސްޓްރީގެ ފަރާތުން ސޮއި ކުރެއްވީ އިސްލާމިކް މިނިސްޓަ ޑރ. އަޙްމަދު ޒާހިރު ޢަލީއެވެ.

މި ސެންޓަރުގައި އެއްފަހަރާއި 1500 މީހުންނަށް ނަމާދުކުރެވޭނެއެވެ. އަދި 450 މީހުންގެ ޖާގައިގެ އެކި ބޭނުންތަކަށް ބޭނުންކުރެވޭނެ ހޯލެއް ހުންނާނެއެވެ.

މީގެ އިތުރުން އިދާރީ އޮފީހާއި، ލައިބްރަރީއާއި، 4 ކްލާސްރޫމް ހިމެނޭއިރު، 2 ސެމިނަރ ރޫމާއި ޕޭންޓްރީއެއް ވެސް މި އިމާރާތުގައި ހުންނާނެ ކަމަށް މައުލޫމާތު ލިބިފައި ވެއެއެވެ.

އިސްލާމިކް މިނިސްޓްރީން ބުނީ މިސްކިތް ހުންނާނީ އޭސީ ކޮށްފައި ކަމަށެވެ. އަދި ކަރަންޓް ހަރަދު ކުޑަކުރުމަށް އިއާދަކުރަނިވި ހަކަތަ ބޭނުންކުރެވޭނެ ކަމަށް. ވެސް މިނިސަޓްރީން ބުނެއެވެ.



ދިއްދޫ އިސްލާމިކް ސެންޓަރު އިމާރާތްކުރުމަށް ހަވާލުކޮށްފައިވަނީ 50،895،299.07 ރުފިޔާއަށެވެ. އަދި މަސައްކަތް ހަވާލުކޮށްފައިވަނީ 540 ދުވަސް ތެރޭގައި ނިންމާގޮތަށެވެ.

މިކަމަށްޓަކާ ބޭއްވި ރަސްމިޔާތުގައި އިސްލާމިކް މިނިސްޓަރު ދެއްކެވި ވާހަކަފުޅުގައި މަސައްކަތް ވީހާވެސް އަވަހަކަށް ފަށައި، ބާރު ސްޕީޑުގައި ކުރިއަށް ގެންދެވުމަށް އެދިވަޑައިގެންނެވިއެވެ.

އަދި މަސައްކަތް ހަވާލުކުރި ކުންފުންޏަކީ ގިނަ މަސައްކަތްތަކެއް ކޮށްފައިވާ ތަޖުރިބާ ހުރި ކުންފުންޏަކަށް ވާތީ މަސައްކަތް ހަލުވިކަމާއެކު ފުރިހަމައަށް ކުރިއަށް ގެންދާނެ ކަމަށް ޔަގީން ކުރައްވާ ކަމަށްވެސް އިސްލާމިކް މިނިސްޓަރު ވިދާޅުވިއެވެ. މި ރަސްމިޔާތުގައި ދިއްދޫ ދާއިރާގެ މެމްބަރު މުހައްމަދު ވަހީދުވެސް ބައިވެރިވެވަޑައިގެންނެވިއެވެ.