މަގުމަތީގެ އަމާންކަން ދެމެހެއްޓުމަށް ހަދާފައިވާ ބުރެއްގައި ޖެހި ބަހެއް ފުރޮޅާލުމުން، ކައިވެންޏެއްގައި ބައިވެރިވުމަށް، އެބަހުގައި ދަތުރުކުރަމުންދިޔަ ދިހަ މީހުން މަރުވެއްޖެއެވެ.

އޮސްޓްރޭލިއާގެ ސިޑްނީގެ ހުޅަނގު-އުތުރަށް، 180 ކިލޯމީޓަރު ދުރުގައި، އޮންނަ އަވަށެއްކަމަށްވާ ގެރެޓާގައި މިދިޔަ އާދީއްތަ ދުވަހު ހިނގި މިއެކްސިޑެންޓުގައި، މަރުވި މީހުންގެ އިތުރުން، 25 މީހަކަށް އެކިވަރުގެ ހާނީއްކަވެފައިވެއެވެ.

ޕޮލިހުން ބުނާ ގޮތުގައި މިފަދަ ނުރައްކާތެރި ބަސް-އެކްސިޑެންޓެއް ، ފާއިތުވި ތިރީސް އަހަރު ދުވަހުގެ ތެރޭގައި، އޮސްޓްރޭލިއާ ދެކިފައެއްނުވެއެވެ.

އެކްސިޑެންޓްވިއިރު، ބަސް ދުއްވަން އިން މީހާ މިހާރުވަނީ ހައްޔަރުކޮށްފައެވެ. އަދި އޭނާގެ މައްޗަށް އިއްޔެ ދައުވާ އުފުލާފައިވާކަމަށް ފުލުހުން ބުނެއެވެ. ޑްރަގަށް ޕޮޒިޓިވް ވޭތޯ ބެލުމަށް ބަސް ދުއްވަން އިން އުމުރުން 58 އަހަރުގެ މީހާ ހޮސްޕިޓަލަށް ގެންދެވި، ޓެސްޓުކުރެވިފައިވާކަމަށް ފުލުހުން ބުނެއެވެ.

މި އެކްސިޑެންޓުގައި މަރުވި މީހުންގެ އާއިލާތަކަށް އޮސްޓްރޭލިއާގެ ބޮޑުވަޒީރު އެންތަނީ އެލްބަނީޒްވަނީ ހަމްދަރުދީގެ މެސެޖެއް ފޮނުއްވަވާފައެވެ.

"ކައިވެންޏެއްގައި ބައިވެރިވުމުން ލިބިގެންދާ އުފަލާއި ހިތްހަމަޖެހުން ، އަޅުގަނޑުމެން އެންމެންނަށް އެނގޭ... މީހަކަށް ޙަޔާތުގައި ތަޖުރިބާކުރެވޭނެ އެންމެ އުފާވެރި އެއް ވަގުތަކީ އެއީ" ، ނޫސްވެރިންނާއި ވާހަކަދައްކަވަމުން ބޮޑުވަޒީރު އަލްބަނީޒް ވިދާޅުވިއެވެ.