އިއްޔެއާއި ހަމަޔަށް، ހައްޖުގެ އަޅުކަމުގައި ބައިވެރިވުމަށް ، އެއް މިލިއަނަށްވުރެ ގިނަ ހައްޖުވެރިން ގައުމުން ބޭރުން ސަޢުދީ ޢަރަބިއްޔާއަށް ޒިޔާރަތްކޮށްފިކަމަށް އެގައުމުގެ މިނިސްޓްރީ އޮފް ހައްޖުން ބުނެފިއެވެ.

ކޮވިޑަށް ފަހު މިހާގިނަ ބަޔަކު، ހައްޖުގެ އަޅުކަމުގައި ބައިވެރިވުމަށް އެއްފަހަރާ ސަޢުދީއަށް އެތެރެވި މިއީ ފުރަތަމަ ފަހަރުކަމުގައިވާތީ، އެންމެންގެ ރައްކާތެރިކަމާއި ސަލާމަތަށްޓަކައި ބޭސްވެރިކަމުގައި ބޭނުންކުރާ މާސްކް އަޅައިގެން އުޅުމަށް ސަޢުދީ ސަރުކާރުންވަނީ އިލްތިމާސްކޮށްފައެވެ.

ސަޢުދީ ސަރުކާރުން ، މަސްޖިދުލް ޙަރަމާއި މަސްޖިދުއް ނަބަވީގެ ޢާއްމު ރިޔާސަތުން ، ނެރުނު ބަޔާނުގައި ބުނެފައިވޭ " މާސްކު އަޅައިގެން އުޅުމަށް ކޮށްފައިވާ އިލްތިމާސް ކުރުމުގެ މަގްޞަދަކީ ހައްޖުވެރިންނާއި އެހެނިހެން މީހުންގެ ރައްކާތެރިކަން ޔަގީންކުރުން".

ކޮވިޑުގެ ހުރަސްތަކަށް ލުއިދިނުމާއި ގުޅިގެން ، ފާއިތުވި ތިން އަހަރު ދުވަހުގެ ތެރޭގައި ހައްޖުގެ އަޅުކަމުގައި މިހާ ގިނަ ބަޔަކު ބައިވެރިވާ މިއީ ފުރަތަމަ އަހަރުކަމަށް ސަޢުދީ ސަރުކާރުން ބުނެއެވެ. " މިހާތަނަށް ، ގާތްގަނޑަކަށް 1،150،000 ހައްޖުވެރިން ސަޢުދީއަށް އަތުވެއްޖެ" ، މިނިސްޓްރީ އޮފް ހައްޖު އެންޑް އުމްރާގެ އަންޑަރ ސެކްރެޓަރީ މުޙައްމަދުލް ބީޖާވީ ވިދާޅުވިއެވެ.



ރިޕޯޓުތައް ބުނާ ގޮތުން ހައްޖުގެ އަޅުކަން އަދާކުރުމަށް މިއަހަރު ސަޢުދީ ޢަރަބިއްޔާއަށް ދެމިލިއަން ހައްޖުވެރިން ޒިއާރަތްކުރާނެއެވެ.