އާދަޔާ ޚިލާފަށް ހޫނުގަދަވުމުގެ ސަބަބުން ފާއިތުވި ތިން ދުވަހުގެ ތެރޭގައި އިންޑިއާގެ އުތުރުގެ އުއްތަރު ޕްރަދޭޝް ސްޓޭޓާއި ބިހާރު ސްޓޭޓުގައި 98 މީހުން މަރުވެފައިވާކަމަށް އޮފިޝަލުން ވިދާޅުވެއްޖެއެވެ.

އޮފިޝަލުން ވިދާޅުވާ ގޮތުގައި ފާއިތުވި ދެތިންދުވަހު އިންޑިއާގެ ބައެއް ސަރަހައްދުތަކުގައިވަނީ ހޫނުމިން 40 ދަރަޖައަށްވުރެ މަތިވެފައެވެ. މި ގަދަ ހޫނުގެ ސަބަބުން އުއްތަރު ޕްރަދޭޝްގައި 54 މީހުން މަރުވެ ، ބިހާރުގައި 44 މީހުން މަރުވެފައިވެއެވެ. އުއްތަރު ޕްރަދޭޝް ސްޓޭޓުން މަރުވި ހުރިހާ އެންމެން މަރުވެފައިވަނީ ބައްލިއާ އަވަށުގައެވެ. ރިޕޯޓްތައް ބުނާ ގޮތުން މަރުވި މީހުންގެ އިތުރުން ، ހޫނުގަދަވެގެން ލިބުނު ގެއްލުންތަކަށް ފަރުވާ ހޯދުމަށް ބައްލިއާ އަވަށުގެ 400 މީހުންވަނީ އެއަވަށުގައި ހުންނަ ހޮސްޕިޓަލުގައި އެޑްމިޓްކުރެވިފައެވެ.



އިރުމަތީގެ ބިހާރުގައި މަރުވި 44 މީހުންގެ ތެރެއިން 35 މީހުން މަރުވީ ޕަޓްނާ ސިޓީގައެވެ. ބާކީ ނުވަ މީހުން މަރުވެފައިވަނީ ބިހާރުގެ އެހެނިހެން އަވަށްތަކުގައިކަމަށް އިންޑިއާ ޓުޑޭ ބުނެއެވެ. މިދިޔަ ހުކުރުދުވަހު ބިހާރުގެ ވެރިރަށް ޕަޓްނާގައި ، ހޫނު އެންމެ ގަދަވިއިރު ހޫނުމިން ހުރީ 44.7 ދަރަޖައިގައިއެވެ. ބިހާރުގެ އިތުރު 11 އަވަށެއްގައިވެސް 44 ދަރަޖައިން މަތިންވަނީ ހޫނުމިން ރިކޯޑުކުރެވިފައެވެ.

އިންޑިއާގެ މޫސުމާބެހޭ އިދާރާ އިންޑިއަން މީޓިއޮރޮލޮޖިކަލް ޑިޕާޓްމަންޓުން މިހާރުވަނީ "ހޫނުގެ ރާޅެއް" އިންޑިއާގެ ވަރަށް ގިނަ ސްޓޭޓްތަކަކަށް އަރާނެކަމަށް ބުނެ ، ބިހާރަށް ރަތް ސަމާލެއް ނެރެފައެވެ.

ރިޕޯޓުތައް ބުނާ ގޮތުން ގަދަ ހޫނުގެ މިރާޅުގެ ސަބަބަނުން ވަރަށް ގިނަ ސްޓޭޓުތަކުގައި ، ހޫނު މޫސުމުގެ ސްކޫލް ޗުއްޓީ މިހާރުވަނީ ދިގުދަންމާލާފައެވެ.

ޞިއްޙީ މަޖައްލާ ދަ ލާންސެޓުގައި މިދިޔަ އަހަރު ޝާއިޢުކުރި ދިރާސާއެއް ބުނާ ގޮތުން 2000 ވަނަ އަހަރުން 2004 ވަނަ އަހަރަށް އަދި 2017 ވަނަ އަހަރުން 2021 ވަނަ އަހަރަށް ، ހޫނުގަދަވުމުގެ ސަބަބުން އިންޑިއާގައި މަރުވި މީހުންގެ ނިސްބަތްވަނީ 55 އިންސައްތަޔަށް މަތިވެފައެވެ.