ސްރީލަންކާގެ ކުރީގެ ރައީސް ގޯޓާބަޔާ ރާޖަޕަކްސާ އަސްކަރީ އޮފިސަރެއްގެ ގޮތުގައި ހުންނެވި އިރު، ހަރަކާތްތެރިވެ ވަޑައިގެންނެވި ސަރަޙައްދަކުން، އެއްކަށްވަޅެއްގައި ޖަމާޢަތެއްގެ މީހުން ވަޅުލާފައިވާތަން ފުލުހުންނަށް ފެނި، އެކަމުގެ ތަޙްގީގު ފަށާ ކުރިޔަށް ގެންދިޔައިރު އެކަމަށް ގޯޓާބަޔާ ހުރަސް އެޅުއްވިކަމަށް ރިޕޯޓެއް ބުނެފިއެވެ.



މި ރިޕޯޓުގައި ބުނާ ގޮތުން މި ކަށްވަޅާއި ، 1989 ވަނަ އަހަރު މާކްސިސްޓުން ކުރި ބަޣާވާތާއި ގުޅުންހުރިކަމަށް ފެނެއެވެ.

މަދަނީ ޖަމްޢިއްޔާތަކަކުން (އިންޓަނޭޝަނަލް ޓުރުތް އެންޑް ޖަސްޓިސް ޕްރޮޖެކްޓް، ޖާނަލިސްޓްސް ފޮރ ޑިމޮކްރަސީ އިން ސްރީލަންކާ އަދި ފެމިލީސް އޮފް ދަ ޑިސްއެޕިއާޑް) އިއްޔެ ނެރުނު މި ރިޕޯޓު ބުނާ ގޮތުން ފާއިތުވި ތިރީސް އަހަރު ދުވަހުގެ ތެރޭގައި މިފަދަ ވިއްސަކަށް ކަށްވަޅު ކޮނެވިފައިވީނަމަވެސް، އެ ބޮޑެތި ކަށްވަޅުތަކުގައި ވަޅުލާފައި ތިބީ ކޮންބައެއް ކަން ފާހަގަކޮށްދީ ، ގަބުރުތަކުގެ ބައިތައް އާއިލާތަކާއި ހަވާލުކޮށްދީފައެއް ނުވެއެވެ.

މި ރިޕޯޓު ބުނާ ގޮތުން މިހާތަނަށް ފެނިފައިނުވާ މިފަދަ ބައިވަރު ކަށްވަޅުތަކެއް ސްރީލަންކާގެ އެކި ސަރަހައްދުތަކުގައި ހުރުމަކީ އެކަށީގެންވާ ކަމެކެވެ އަދި އެކަށްވަޅުތަކުގައި އެތައް ހާސް ބަޔަކު ވަޅުލެވިފައިވުމަކީވެސް އެކަށީގެންވާ ކަމެކެވެ.

ސްރީލަންކާގެ ސަރުކާރުތަކުން އުފެއްދި ތަޙްގީގީ އެއްވެސް ކަމިޝަނަކާއި މިފަދަ ކަށްވަޅުތަކާއި ބެހޭ ތަޙްގީގުތައް ކުރުމުގެ ޒިންމާ ހަވާލުކޮށްފައިނުވާކަމަށްވެސް މިރިޕޯޓު ބުންޏެވެ.